Shillong:Ha ka step jong ka 12 Tarik Lber 2025 ki ar tylli ki kali ki la shah wiang ding ha ki briew ki bym pat lah ban ithuh, ia kane la pyntip da u Superintendent of Police ka East Khasi Hill u bah Vivek Syiem.
Kine ki ar tylli ki kali ki ba la shah wiang ding ki kynthup ia ka kali jong ka tnad Meghalaya Infrastructure Development Finance Corporation (MIDFC) ka ba don ia u registration number ML05 AB 1290 kaba la pynieng ha surok ka Dongkadiang Nongmynsong, katba kawei ka kali ka dei kaba don ia u registration number ML 05 K 7549 kaba la pynieng ha phyllaw ka NF Railway Officer Rest House ha Laban.
Haba kren bad ki ladpathai khubor u bah Vivek Syiem u la ong ba ka tnad pulit ka la bthah ban pynkhlain ia ki bor pahara ha kylleng ka sorkar Shillong ban teh lakam ia kano kano ka jingjia bym shongsuk shongshngain.
“Ka don ka jingjia bym don ka shongsuk shongshngain hadien ba ki sengbhalang ki la wan tur sha Assembly, ban pynpaw ia ka jingpyrshah ha ka 11 Tarik Lber 2025” u la ong.
U la bynap “Ha ka sngi ba bud ki don ar tylli ki kali sorkar ki ba la shah wiang ding, ia ki ar tylli ki kali ki ba kynthup ia ka kali ha phyllaw ka NF Railway Officer, Rest House kaba don ha Laban bad kawei ka kali ka tnad MIDFC ha Dongkadiang Nongmynsong”.
U bah Syiem u la iathuh ba kane ka jingjia shah thang kali ka dei kaba la jia ha ka 12 Tarik mynstep ha kaba ka kali ha Nongmynsong ka dei jong ka tnad MIDFC bad kawei ka dei jong u nongshet ha NF Railway Officer, Rest House kaba don ha Laban.
“Na ka liang jongngi , ngi la pynmih ka jingbthah sha baroh ban long ki ba husiar ha kaba iadei bad ki jaka ba ki buh ia ki kali Sorkar bad ka tnad kan dang pynkhlaiñ shuh shuh ia ki bor pahara ban tehlakam ia kum kine ki jingjia” u la ong .
Phi don ban ong eiei?