Don ka jingshoh bar jylla bad pynpait kali, ha ka jingiaid rali ka FKJGP

Shillong:Ka seng Federation of Khasi Jaiñtia Garo People (FKJGP) mynta ka sngi, ka la pynlong ka jingiaid paitbah kum shi bynta ha kaba iadei bad ka jingkyrduh kam kyrduh jam jong ki khun samla ha ka jylla, ha kaba ki don da ki hajar ngut, ki samla kiba wan shim bynta na kylleng.

Ha shwa kane ka jingiaid paitbah, ka seng ka la pynlong shwa ia ka jingialang ba lyngkot ha Motphran, ka jaka sangeh kali Jaiaw bad ka la sdang ka jingiaid paitbah na Motphran ter ter sha Khyndailad, DC ophis, ka iing u Lat, IGP, Dhanketi bad ki la pynkut noh ha madan iew rynghep.

Ha kane ka jingiaid paitbah, la sakhi ruh ba ki dukan jongki bar jylla ki la khangdam lut bad ia ki dukan bad ki shu iapeit tang napoh, namar kim nud shuh tang ban mih.
Ha kane ka jingiaid paidbah jongka seng FKJGP, ki la don ruh ki riew shim kabu, da kaba ki la shoh bad bom ia ki bar jylla kiba iaid bad kiba shong ha ki kali jongki bad kiba shong ha ki ar shaka ruh kumjuh bad shah pynpait ruh ia ki ïit kali ha man la ki jaka.

Kane ka jingiaid paitbah kaba la pynlong da ka FKJGP sengkmie ka dei halor ka jingkyrduhkam kyrduh jam jongki samla pule ha ka jylla bad ban dawa na ka sorkar ban thaw noh da ka aiñ bad ki lad ki lynti ha ka iohkam iohjam jongki khun samla.
U President ba rangbah jongka seng FKJGP, u bah Dundee Khongsit, haba ai jingkren hadien ka jingiaid paitbah ha iew rynghep ula ong ba kane kam pat dei ka por ban ia pyni bor, hynrei ka dei ka jing ia aireng bad ka sorkar bad lada ka sorkar ka dang sngap ia kine ki jingdawa, kan sa poi ka por ba wat ka snam kan lyngkien ha madan ruh ruh, na ka bynta ka lawei jongki khun samla.

Ka seng ka la mudui ruh ia ka sorkar ba ka dei ban pyndap noh ia ki kam kiba thylli ha ki tnad bapher bapher jong kane ka sorkar jylla. Kumba ka long mynta ka seng ka lap ruh ba ki don haduh 7,653 tylli kita ki kam ba thylli hapoh ki department bapher bapher ha ka jylla; hynrei kaba ki lyngngoh, ka long ba u Chief Minister u Conrad Sangma, ula jubab bakla, ba u ong ba ki don tang kumba 3 hajar tylli kita ki kam bad kane ka dei tang ka jingkren insult ia ki khun samla kiba wad ia ki kam ki jam, lane kaba mut ba u Chief Minister um don kata ka jingkitkhlieh, na ka bynta ki samla wadkam.