Sngewthamula ka HYC, ba u Chairman HLC u kwah jingpynshai na ka SMB

Shillong: Ka HYC Sengkmie, ha ka sngi Palei ka la ong ba ka sngew thamula ba u Symbud Myntri Rangbah ka jylla u Bah Prestone Tynsong, u la pan ïa ka kaiphod ka ban pynshisha ïa ka jingdon ki nongtrei kiba sah ha Them Ïew Mawlong.

Ïa kane u la ong halor kito ki nongtrei kiba don tang kumba 148 ngut kiba dei hok ban ïoh ïa ka jaka na ka sorkar.
“Ka long kaba sngew thamula ba u Chairman ka Committee ba khmih ïa ka jingpynkynriah ïa ki Harijan un bthah ïa ka Shillong Municipal Board bad ka Tnat Pynroi sor ban pynshai la ka RTI ba la ai sha ka seng kadei kaba shisha bad hadien kane dei ban aiti sha ka sorkar. Kumno ka sorkar kaba la thaw ïa ka High Level Committee naduh u snem 2018 kaba long mynta lah 6 snem kam tip eiei ka jingdon kine ki 148 ki longïing ki bym dei ki nongtrei sorkar, sngew thamula ba kat u Chairman ka HLC U Bah Prestone Tynsong um tip ïa kane,” ong ka HYC.

U Nongïalam ka HYC u la ong ruh kan long kaba sngew thamula ruh ba kumno u Symbud Myntri Rangbah u phah biang ban pynshisha ïa ka RTI ba la lap da ka seng sha ka SMB haba ka SMB hi kadei kaba la ai ïa ka RTI sha ka seng.
“Ka jingong u Symbud Myntri Rangbah ba ka jubab ka RTI ka lah ban ym long kaba biang haduh 100% kumta hap donkam biang ban phah pynshisha sha ka SMB ka long kaba sngew kamkai namar kumno yn phah pynshisha biang sha ka SMB haba dei kane kaba ai ïa ka RTI sha ka seng, bad lada ka don ka jingbakla kaba mut ka sorkar kadei ban shimkam ne pynshitom ïa u Nodal officer uba la aiti ïa ka jingkheiñ kaba bakla, kine baroh dei tang ki kam ban pynslem kai jong ka Sorkar,” ong u Bah Roy.

U la ong ba lada ka seng kam lap ïa kane ka kam lyngba ka RTI kamut ka sorkar ka la shu aiei beit ïa ki jaka sha ki 342 tylli ki longïing kaba mut ba lah 6 snem kim shym tip ïa ki kot ki sla halor kane ka kam them metor.
U la ong ba ka seng ka dawa ba ka sorkar kam dei ban shu aiei ïa ki jaka sha ki 148 ki longïing kiba sah beaiñ hynrei tang ïa ki 195 ki longïing kiba dei hok, bad ka seng kan ym ailad da lei lei ruh ba ka sorkar kan shu ai ei ka jaka sha kiba sah beaiñ.