Rah ka thei samla Shillong, ia ka nam thei bhabriew Dong Mihngi

Shillong, 21 Nohprah:
Ka thei samla kaba dang 25 snem karta ka Wanrida Pyngrope  ka la ioh rah ia ka nam thei bhabriew na ka thaiñ shatei Lam Mihngi ha ka rynsan ia kob kaba la long ha nongbah Guwahati. Haba kren sha ki nongthohkhubor mynta ka sngi ka kong Wanrida ka la ong ba ka sngew sarong ba ka la ioh ia katei ka nam da kaba ka la lah ban wanrah nam wanrah burom ia ka jylla. Ka la ong ba ka jingjop jong ka ia katei ka nam kam dei da ka lynti kaba suk naba hap ban long kiba trei shitom ban ioh ia katei ka nam thei bhabriew.
Ha katei ka jingiakob ki ladon haduh 35 ngut ki thei samla na ki jylla bapher bapher ka thaiñ shatei Lam mihngi kiba la wan ban ia shim bynta bad ki don saw ngut ki samla na nongbah Shillong. Ka kong Wanrida ka la ong ba dei ka hynmen jong ka kaba la pynshlur ia ka ban leit ia shim bynta ha katei ka jingiakob. Katei ka samla ka la ong ba mynta ka pynkhreh ban ia kob ban ioh rah ia ka nam thei bhabriew ha ka ri india baroh kawei kaba yn sdang noh ia ka audition ha nongbah Guwahati ha ka 4 tarik u kyllalyngkot.