Yn iakren U Mukul ia ka ILP
Shillong, 14 Nailar:
U Myntri Rangbah u Mukul Sangma u la rai ban iakynduh ia ki seng bhalang bad ki seng sain pyrthei ban iakren ia ka jingpyntreikam ia ka Inner Line Permit (ILP).
Haba kren mynta ka sngi, sha ki nongthoh khu bor, u Principal Secretary (Home) u KS Kropha u la iathuh ba u Myntri Rang bah un iakyn duh ia ki sengbhalang ha ka 29 tarik Nailar, bad un sa iakynduh sa ia ki seng sain pyrthei ha ka 3 tarik Nailur.
“Ka sorkar kan bi shar bniah kiba lah ban mih lada rai ban pyntrei kam ia ka ILP ha kane ka jylla,”, la ong u Kropha.
Kane ka jingkhot iakren u Myntri Rangbah ka long hadien ba ki sengbhalang ki la rai ban pynlong ia ka jingialang paidbah ha ka sngi Thohdieng, ban dawa ban pyntreikam ia ka ILP.
Katkum ka jingong jong u Kropha, ka sorkar kan peit la ka Bengal Eastern Frontier Regulation, 1873 lah ban pyntreikam ha baroh kawei ka jylla.
Lah ban kdew ba ka jingweng noh ia ka Bengal Eastern Frontier Regulation, 1873 ha 1897 na ka thain Garo Hills na ki kyndon jong ka ILP.
Katkum ka kaiphod jong ka High Level Committee on Influx ba la khlieh da u Symbud Myntri Rangbah barim Bah Bindo Mathew Lanong ka la ong ba ka jingpynkylla ia ka Act ha u snem 1897 ka la pynduh noh kumba 35 tylli ki jingpyntreikam bad ka Garo Hills ka la lait noh na ka ILP.
U Kropha u la ong ba ka ILP, katkum ka Bengal Eastern Frontier Regulation, 1873, ka treikam ia ki nongshong shnong ka ri bad namarkata, ka jingpyntreikam ia ka ILP, lah ban don ki jingeh watla ka sorkar kan eksamin ia kane.
“Lada ki nongwei kin hap ban pyrkhing, ka Foreigners Act 1946 bad ka Foreigners (Protected Areas) Order, 1958 kin hap ban pynkylla bad kane lah ban leh da ka Parliament. Kine, nalor kiwei ki jingpyrkhat ba iadei bad ka ioh ka kot, bad kiwei ki ba lah ban mih ia ki paidbah, donkam ban peit bniah bad husiar”, la ong u Principal Secretary (Home).
Haba kylli ia ka kaiphod jong ka HLC on Influx, u Kropha u la ong ba ka sorkar ka dang eksamin ia ka komiti.
Haba pynpaw ba ka sorkar ka sngewkhia ia kane ka jingwan ki briew nabar, u la ong ba ka sorkar kan thaw ia ki lad ba larkam ban weng ia ka jingeh.
U la ong ba ka jingbuh ia ka Directorate jong ka Anti-Infiltration, bad ka jingthaw ia ki Police Station ba thymmai ki dei ki lad ba ka sorkar ka la thaw ban pynkhlain ban tehlakam ia ka jingwan rung ki briew nabar.
Ban peitngor ia ka jingwan rung ki briew nabar, na ka liang u Kropha u la iathuh ba la buh 11 tylli ki Police Station ha ka jylla kiba don hajan bad ka Bangladesh nalor ki Infiltration check Post bad ki Watch post.
Ka Labour Department ka la pyntreikam ia ka Inter State Migrant Workmen (Regulation of Employment and Condition of Service) Act, 1979 bad ka Inter State Migrant Workmen (Regulation of Employment and Condition of Service) Rules, 1985 da ka jingthmu ban pyrkhing ia ka jingwan briew kiba nabar kiba wan trei bylla. Ban pynkhlain ia kane, ka sorkar ka la mang 39 tylli ki kam kum ki Labour Inspector bad kine yn sa thung shen.
Phi don ban ong eiei?