Nongpoh: Ka seng Hynniewtrep Youth’s Council, Raid Nongtung Circle, ka la phah da ka dorkhas sha ka Deputy Commissioner Ri Bhoi District, kaba long ruh kum ka jingdawa ban pynsangeh noh mardor halor ka jingthmu die khyndew sha ki shipai Border Security Force ha madan Umsohphoh bad ha Lumlaru, kiba hap hapoh ka Raid Nongtung ha Ri Bhoi.
Ha katei ka Dorkhas, kaba la soi da u Bah Hercules Suting, General Secretary ka HYC ha Ri Bhoi, la pynpaw ba na ka liang HYC RNC, ka pyrshah jur halor katei ka jingthmu thied jaka ki shipai BSF ha katei ka thain.
Ka HYC, ka la pynpaw ruh ba ka nongrim kaba la pynlong ia ka HYC ba kan pyrshah, ka dei hadien ba ki la iohi ia shibun ki kam pynibor da ki shipai, ha kito ki jaka kaba ki shong ki sah bad kaba la wanrah ruh ia ka jingshongsyier ia ki paidbah nongleit nongwan bad khamtam eh ia ki paidbah nongshnong.
Lyngba jong katei ka dorkhas, ka HYC ka la pynshai ruh da kaba ong ba kitei ki shipai kin ioh jaka ha katei ka thain, kin pynkylla ruh ia katei ka jaka sha kata ka jaka kaba la tip kum ki Cantonment area bad kitei ki Cantonment Area kim hap shuh hapoh ka jingpeit jingkhmih ka District Council bad ki bor synshar trai trai Ri kum ki syiem, ki Raid bad ki shnong.
Dang ha kine ki sngi ngi ioh jing tip la don ki kynhun na Raid Nongtung bad ki riew shimet ki la rai ban die iaka jaka kaba hap hapoh Raid Nongtung sha ki shipai BSF bad halor katei na ka liang ka seng ka pyrshah jur ia kane ka Jingthmu bad ngi dawa jur na ka DC ba phin pynsangeh mardor iaka jingthmu die jaka sha ki shipai BSF.
Phi don ban ong eiei?