Shillong: U Director ka tnad ka koit ka khiah u Dr Aman War, u iathuh ba mynta ka sngi ki briew kiba ioh covid positive ki long haduh 182 ngut, ha East Khasi Hills District 121, ha RiBhoi District 31 ngut, ha West Khasi Hills District uwei ha North Garo Hills District 2 ngut bad ha West Garo Hills District 12 ngut.
Haba iakren bad ki ladpathai khubor u Dr War, u iathuh ba ki 121 ngut ki briew ki ba la test covid positive ha East Khasi Hills District ki kynthup ia ki 97 ngut ki High risk contact, 5 ngut ki kynhun shipai, 7 ngut ki nurse bad 6 ngut ki nongtrei jong ka Civil hospital uwei u Doctor bad kawei ka nurse jong ka Ganesh Das Hospital.
Ha RiBhoi District kiba la test covid positive ki long 31 ngut kynthup ia ki 13 ngut ki kynhun shipai bad 18 ngut ki High risk contact; ha West Khasi Hills District uwei u dei u high risk contact, ha West Garo Hills District 12 ngut ki ba la test covid positive ki kynthup ia ki 7 ngut ki kynhun shipai, uwei uba ioh ILI case u dei u nongtrei ka koit ka khiah, uwei u ba wan phai na shabar jylla bad 2 ngut ki high risk contact.
Na North Garo Hills District uwei u dei u high risk contact bad u wei u dei ba wan phai na shabar ka jylla ha East Garo Hills district ki 15 ngut kiba la test Covid positive ki kynthup ia ki 14 ngut ki nongshong dukan ha Rongjeng Bazar bad uwei u High Risk Contact.
Ha ka jylla haduh mynta ki briew kiba don ia kane ka jingpang ki la kot sha ka 1374 ngut, ha East Khasi Hills District 915 ngut, ha Ri Bhoi District 120 ngut, ha West Khasi Hills District 31 ngut, ha South West Khasi Hills District uwei ha West Jaintia Hills District 8 ngut, ha East Jaintia Hills District 25 ngut ha East Garo Hills District 97 ngut, ha West Garo Hills District 144 ngut, ha South Garo Hills District 22 ngut, ha North Garo Hills District 8 ngut bad ha South West Garo Hill District 3 ngut.
Ki briew kiba la ioh jingkoit pura ki long 1527 ngut kynthup ia ki 59 ngut ki ba la koit mynta ka sngi. Ki sample kiba la dep ban phah test ki long 97,550 tylli kiba long negative ki long 94418 tylli bad ki result kiba dang ap ki long 216 tylli bad ki briew kiba la khlad na kane ka jingpang ki long 15 ngut kynthup ia uwei u ba la khlad myn hynnin ka sngi ha West Khasi Hills District.
U Dr War u la iathuh ba une u briew u ba la khlad, u dei u ba la tip kyrteng kum u Khangsngi Nongsiej u ba shong ba sah ha Ksehkohlong kaba hap ha Mawthadrashain Block u dei u ba la 65 snem ka rta bad la ialam ia u ha Mirang Civil Hospital na ka daw ba u shitom ban ring mynsiem, hynrei ha ba la test la lap ba u don ia ka jingpang Covid -19 bad ki la phah noh ban rah ia u sha Civil Hospital namar ka jingshitom jur, hynrei tang shiteng lynti u la khlad noh .
Phi don ban ong eiei?