Hap ban iakhih paidbah ki draibar trok, naba kwah pynheh bainong

Ka jing iakhih jong ki draibar trok, ha Jaintia hills, ka long kaba sngew kyndit jur bad kaba sngew lem ruh ia ki bad ka daw, ka long, ba ki kwah pynheh bai nong, ha kaba kit dewbilat na kitei ki phew tylli ki kompeni kiba don ha Lumshnong, hynrei ka mih pynban, ka jingleh bym niew briew bad ka jing nang pynshit ia kitei draibar, da kitei ki kompeni.

Kane ka jing iakhih jongki nongniah trok, kam dei shuh kaba thymmai, hynrei, ka dei kaba la iai iakren ia kajuh shi kajuh, la bun bun snem bad kaba sngew lyngngoh ka long ba ka sorkar jylla, lyngba ka tnat ka kit ka bah, ka shu peit kai pynban bad kam don kano kano ka jing pyrkhat, ban iarap ia la ki jong ki briew bad kam kut tang katta, hynrei kine ki kompeni, ki nang pyn bitar shuh ia ki trai jylla, da kaba ki rah noh ia ki kudam buh mar sha Guwahati bad nangta, ki thied sa da ki trok lajong, ba kin ia kit mar noh dalade hi.

Ka jingleh u myntri jong u myntri ka tnat ka kit ka bah, ka pyni shai ba um salia satia ia katei ka jingeh jong ki nongniah trok trai shnong, namar ba wat ia ka rai jong ka sorkar jylla, ban kyntiew ia ka bai kit, hynrei ki kompeni, ki pynkhein pyllein pyllein.

Namar ba kane ka kam, ka la jyrwit shaba palat, kumta, ka la dei ia ki bor shnong bad ia ki seng bapher jong katei ka thain, ba kin iakren beit mar khmat bad u myntri rangbah ka jylla, ban iashai, halor kane ka jingleh mynthi jong ka tnat ka kit ka bah bad kine ki jingjia (naduh ki kar khana coke), ki la dei ban pyn kyndit bynriew ia ki briew jong ka thain, halor ki jingeh ba ki don bad ki jing iai leh mynthi jong kitei ki tnat sorkar.

Ka la dei ruh ia ka sorkar jylla, ba kan peit biang noh ia ki kyndon jong ka jingplie ia ki karkhana bapher ha ka jylla, namar, ka la paw shai ba kane ka ain, kaba mynta ka la rim eh bad ka la donkam ban pynbeit thymmai noh, ba ki karkhana kiba wan na shabar, kin ailad ia ki trai shnong, ha ka kamai kajih; namar ba kumba ka long mynta, la iohi, ba kum katei ka jing pyrkhat, kam don satia ha kitei ki kompeni, hynrei ki shu wan hangne, tang ban kjit ia ka dud ia ka ngap bad ban kynting spah ialade, katba ki trai shnong, ki shu long tang ki nongpeit jawdud ialade, ha ki rukom bapher bapher.