Shillong:U Bah PN Syiem, CEM barim ka Khasi District Council bad U Syiem khynnah barim jong ka Hima Bhowal, u iathuh ba ka dei tang ka Border hat, kaba don ha Balat, kaba treikam ha Ri Khasi Jaintia bad u ong “Kato ruh ka dei, da ka jingtrei shitom jongnga kum U Syiem khynnah ha kato ka por” bad katei ka dei tang kawei ka hat ha East Khasi hill, kaba don ha hima Bhowal jong ka Mawsynram Constituency.
U bah Syiem, ha kajuh ka por, u kynnoh ba ki nongialam jong ka sorkar jylla, kim sngewthuh satia, na ka bynta ban pynim ia ki nongshong khappud jong ka Bangladesh, da kaba plie ia ki export point, ki border hat bad kiwei kiwei bad u kynnoh ba ka sorkar jylla, kam lah satia ban iakren ia beit halor kane ka mat bad ka sorkar Bangladesh.
Ha kajuh ka por, u iathuh shuh shuh, ba na ka bynta ban plie ia ki iew khappud lane ki export point, ka donkam ban don ka jing iadei bad ka tnat khaii pateng jong ka sorkar India bad nangta bad ka tnat pla pisa jong ka sorkar India bad nangta u ong, ba ka donkam ruh ia ka jing iarap jong ka tnat bar ri jong ka sorkar India ruh. U Bah Syiem, u ong “Ban iakren ia kine ki jongngi, ban take up ia kitei ki issue, very sad. Yn nai pat iakren ia ka Dhaka, ngi donkam ia ki nong mihkhmat kiba ka ministry of Finance ka jan, ka ministry of commerce ka jan, ka external ministry ka jan, ka Dhaka ka jan, ha ngi nga imat ka jngai bah, ka jngai kumba nangne sha London, sha Washington”.
U bah Syiem, u ong shuh shuh ba kum ka jylla jongngi, kaba rit, ka suk bha ban pynbiang bad u ong “Ban ong ba ka state jongngi, khlem ka central, ym lah, ka long wrong” bad u ong ba ki state kiba heh ki shitom kein, namar ba ka jingdon briew ka don da ki 5klur, 6 klur, 10 klur “Ka population jongngi kaba hapoh 50 lak, lada ngi nang ia kine ki resources jongngi ban pyndonkam bad ka Bangladesh kan long ka surplus state” bad kumta, u ong ba ka jingbym lah ban plie ia ki iew ki hat sha khappud bad ka Bangladesh, ka dei na ka jing bym lerkam jong ki nongmihkhmat.
“Kaba donkam eh mynta ha ki shnong border jongngi, ka dei ka border highway, public border highway. Ngam iakren ia ka highway jong ki BSF bad ka State Government, ka la dei ban phai khmat shata” bad u ong shuh ban pynroi ia ka thain khappud, da kaba shna lynti iaid kjat, shna iing dorbar, sha jingkieng iaid kjat bad kitei ki donkam; hynrei ban duna ka jing kynriah jong ki briew na ki nongkyndong sha sor, ka donkam ka border highways ban pyniasoh ia ka Dawki, sha Shella sha Balat, sha Ranikor bad katei kan pynsuk ia ka leit ka wan bad ka khaii pateng bad ka Bangladesh.
Phi don ban ong eiei?