Sa ka kylla, kaba lai jong ka khlam covid

Ka kylla kaba lai jong ka khlam covid, ka la wan lynshop biang ia ka Ri India bad ia ka jylla Meghalaya ruh kumjuh bad la iohi, ha kine ki sngi, ba kiba pang covid ki la poi sha ka palat 3lak ne duna ha ka shisngi, ha baroh kawei ka Ri bad nangta, ki la sdang kiew sha ka 300ngut antad ha ka shisngi, ha ka jylla.

Hynrei ka jingkylli, ka wan hangne, la mano kein ban iada ia u khun bynriew, na kat kane ka kordit kaba wan lynshop bad halor katei ka jingkylli, ka jubab kaba beit, ka long beit ba tang U Blei, uba buh bad uba shim.

Hap kren ia kata, namar ba ha kane ka kylla, kaba lai, la iohi, ba ki heh ki hain, kiba bud pyrkhing ia ki kyndon ka koit ka khiah, ki ioh biang ia katei ka khlam bad kitei ki kynthup ia u Lat ka jylla, uba la dep injek, ha ka sien kaba lai, kaba ki khot booster lane ban pynkhlain ia ka met bad nangta, u myntri rangbah, uba la dep injek arsien pura bad nangta sa ki nongtrei ka koit ka khiah, kiba ioh pang da ki phew ngut ha ka shisngi, ha kine ki sngi.

Ym tang katta, la iohi, ba ha kane ka kylla kaba lai (kumba ju long), kiba bun ki nongpang, ki dei na ki jaka kiba kham bud bha ia ki kyndon covid bad kitei ki kynthup ia ka nongbah Shillong, ha kaba kiba ioh pang, ki la nang saphred biang, katba haba peit sha ki jaka ba kham shajngai ne sha kyndong kum sha South West Khasi Hills, East Jaintia Hills, South Garo Hills, North Garo hills, katei ka jingpang kam don eiei.

Ka sorkar kam lah ban pyn jari pura ia ki kyndon jongka, namar ba dang ha ka rakhe jubili ksiar jong ka Meghalaya, la iohi, ba wat u nongialam liang pyrshah, u symbud myntri rangbah, u lamphang dorbar, ba ki ia rwai ia siaw, khlem da deng mask (namar ba kam long hi ruh ban leh kumta) bad nangta sa ka jing ia lum briew, kaba bun ha madan Polo.
Ngin hap ban ia duwai Blei, tangba un weng noh shi syndon ia kane ka jingpang khlam na ka Ri Khasi ba ieid jongngi bad lait nangta, kan long kaba jwat shi katdei, ban pynduh jait ia kane ka khlam, khamtam, haba kane ka elekshon MLA 2023, ka la poi noh ha tyngkong iing jongngi; kumta, ngi hap ban sngewthuh ba ka jing pynkhein kyndon, kan jubor tyngeh, namar ba ki jing ia lum briew, kin sdang noh artad, nangne shakhmat.