Jan dap smam, ka jhad jong ka NPP

Kiba leit pyn iasoh ialade sha ka seng National Peoples Party (NPP), ki nang iai bteng ha kine ki sngi, tangba haduh mynta, ngi iohi ba kiba hap ha ka jar, ki dei ki kha rit suda lane ki kha saw bad kitei ki dei ki MDC, ki MLA rim bad kiwei; hynrei, la iathuh ba ki kha bah, lane ki MLA, ki dang jied jingbam bang bad wat la katta, la shu antad, ba kin don hi katto katne ngut, ki ban pyn iasoh ialade sha katei ka seng, ha shwa ka elekshon MLA 2023.

Halor kane ka mat, ka la dei ruh ban pyn kynmaw ia ki jingkren jong ki heh ka NPP lane ka jingkren U Bah Prestone Tynsong, ha kaba la pyn ia syriem, ia ka seng Congress, ba ka dei ka jhad kaba la ngam bad mynta ruh, haba shu peit, la iohi, kumba ka jingbun kiba kynthih sha ka seng NPP, kan pynlong ia ka jhad jong ka NPP, ba kan shlei mam, ha shwa ka elekshon MLA 2023.

Kam dei tang kata, la iohi shuh shuh ba kiba wan rung thymmai sha katei ka seng, ki ioh ruh ia ka khusnam kaba heh ba heh, namar ba tang rung ruh pat rung bha (lehse dang ha phyllaw iing), hynrei, la ioh tiket MLA 2023.
Ka jingleh jong ka seng NPP, ha kine ki sngi, ka dei ka jing pyrkhat kaba hak dak, kaba muk mak lane ka kam thied nokot bad kam dei satia, ka nuksa jong ka BJP, kaba la pynmih ia ki snar, kum U Vajpayee, U Narendra Modi, U Rajnath Singh bad shibun kiwei pat ki nongialam, kiba la da shah phrang bha ialade ha ka shlem jong ka RSS lane jong kiwei pat ki seng kiba dei ka jabieng trei kam jong ka seng BJP.

U Conrad Sangma bad ka iing jongu, ki la dei ban long ki briew kiba peitngor bha ha kine ki sngi, halor kane ka jing ia kynthih ki dohkha sha ka jhad jong ka NPP, namar ba kum kane ka jingjia, ka la jia ha ka seng Congress ruh, ha kaba wat tang ia ka tiket, ka shongdor da ki phew lak ban pynioh bad ba ki heh jong ka MPCC bad khamtam ka AICC, ki la dei shisha ki blei ia kito kiba don ha katei ka seng.
Ki Sangma, ki la mad ia ka khep, ha kaba ki don tang 2ngut ki MLA ha iing dorbar jylla bad lada kim khein jingkhein bha, kaba ima, ka long ba ioh ka baje ka khyrwait biang shadien, namar ba kito kiba ju mlien ban ryngkoh diengkper, ki pyrkhat beit ialade, ym ia ka parti ba ki don.