Shillong:Ha kine ki sngi, ba la wan u slap ki nongshong shnong ha ki mad ia ka jingeh kiba mih na ka jingsahteng ki katto katne ki Smart City Project ha nongbah Shillong, la ka dei ka jingshlei um ha ka jingtei ia ka nala ha 4th furlong, ne ha Surok kaba don ha Lachumiere, kaba la wanrah ka jingkhnium kaba khraw na ki paidbah.
Haba ioh ban iakren bad u ma Sniawbhalang Dhar, Symbud Myntri Rangbah ka sorkar Jylla u ba long ruh u Myntri ka tnad pynroi sor, u la iathuh ba ia ki Project kiba dang sahteng hapoh ka Smart City Project yn aiti noh sha ka tnad PWD jong ka Sorkar Jylla ban pyndep noh.
U bah Dhar u la iathuh ba ha ka jingialang ba la don lang ka tnad pynroi sor bad ka tnad PWD la shim ia ka rai ba ka Smart City project yn sangeh noh bad na ka liang ka PWD kan pynkhreh ia ka Detail Project Report (DPR) ban pynbha ia kine ki project kiba dang sahteng ha ryngkat kiwei pat ki surok ha Nongbah Shillong.
“Kane ka long namar ba ki Surok ki long kiba rit ha kine ki jaka kumta ka jynjar ban pyntreikam ia ka smart City project kumta ngi la sangeh noh ia kane. Ha ka jingialang bad ka Urban Department bad ka PWD ngin pynsangeh noh ia kane bad mynta u snem hi ngin sa ioh ban shna ia kane ka Surok na ka liang ka PWD bad shen hi ha ki bnai ban wan kan sa mang pisa halor kane” u la ong.
U la bynrap “Lada ngi peit ia kiwei ki project hi na ka Smart City project baroh hi ki iaid beit iaid ryntih bad bun hi ki project ki la jan dep bad baroh kine ki jingshna hapoh kane ka project ngi kyrmen ba ha u snem 2026 kin lah ban pyndep noh bad hadien kane ngin sa wanrah pat ia ka wat ba ar ka 2.0 Smart City project”.
Haba kylli halor ka jingbym lah ban pyndep hapoh ka Smart City project, u Sniawbhalang Dhar, u la ong “Em kam dei namar ba ngim lah ban pyndep ia kane hapoh kane ka project, hynrei ha ka jingshisha ka don ka jingduna ia ka jaka ba donkam katkum kane ka project bad kiba bun ki daw bad ki kyndon ba kane ka Surok ym lah ban pyndep hapoh ka Smart City project”.
“Kumta haba ngi la sngap lang ia kane na ka tnad Urban bad PWD, ngi la rai ban sangeh noh bad ban aiti noh sha ka PWD ba kan shna pynbha noh ia baroh hi ki surok ha ka Nongbah Shillong. Kan ym don ka jingpynlut tam ia ka pisa, namar kane ka ju long kumne hi ha ki project bapher bapher” u la ong.
U la bynrap “Ym tang kane hynrei ka jia baroh ki jaka kiba ka Smart City project kam shym la lah ban pyndep ka PWD hi kan sa shim khia ban pynbha ia baroh ki project ba dang sahteng”.
Phi don ban ong eiei?