Shillong:Ka eriong bah Fani, ka la lynshop ia ki bynta jong ka Ri Khasi Jaintia, ha ka sngi Saitjain, ha kaba u slap uba ther baroh shisngi, ula poi sha ka 126.8 millimetre, katba kum ka jingkhein jong ka tnat peit mariang, ka Meteoroligal Department, kaba don ha Upper Shillong. Ka jinghap slap hynnin ka sngi, ka dei ruh kaba jur tam jong une u snem 2019, uba dei u snem, uba duna slap shibun eh, ha kine ki bun bnai ba ladep.
U slap bah, uba ther baroh shisngi, ula pynshlei lut ia ki um ki wah, ia ki surok iaid kali bad ula pynlip ia ka ding ilektrik bad pynsniew ia ka network mobile phone, ha ka nongbah Shillong bad ha kylleng ka Ri Khasi, ha kaba hynnin ka sngi, ki don bun bah ki shnong ki bym ioh ding, namar ka jingther jong u lapbah ha kylleng ka Ri Khasi.
Shah ktah 21 tylli ki shnong, bun ha East Khasi na ka Fani
Katkum ka kaiphod ba la ioh na ka sorkar jylla ka tnad State Disaster Management Authority (SDMA), ki don 21 tylli ki shnong ba shah syllad ha ka Fani, 14 ngut ki briew kiba shah ktah bad sa uwei uba mynsaw.
Ki don ruh 17 tylli ki ing ba shah ktah ha kane ka lyer iong Fani.
Katkum ka kaiphod, ha Ri-Bhoi kawei ka shnong ba shah ktah, kawei ka iing, ha South Garo Hills, kawei ka shnong, 2 tylli ki iing, ha East Khasi Hills, 12 tylli ki shnong, 5 ki iing bad 1 ngut ba mynsaw. Ha West Khasi Hills, 2 tylli ki shnong, 9 ngut ki briew ba shah ktah, 2 tylli ki iing. Ha South West Khasi Hills, 5 tylli ki shnong ba shah ktah, 6 tylli ki iing, ha East Jaintia Hills, kawei ka shnong ba shah ktah, kawei ka iing.
Ka sorkar ka dang ap ruh ia ka kaiphod ba bniah namar ba kam pat ioh jingkhein lut.
Phi don ban ong eiei?