New Delhi: Ka Pakistan, ka la iai bteng ban siat da ki drone jongka, sha ki bynta jong ka Jammu and Kashmir, Punjab bad ka Rajasthan, ha ka sngi kaba ar mynta ka sngi. Kawei na kitei ki jingsiat drone, ka dei ha ka ktem jong ki shipai ha Awantipora, ha kaba la lah ban siat pynhap noh da ki shipai jong ka India.
Ki drone kiba la siat ki kynthup ha Jammu, Samba bad ha Rajouri ha Jammu and Kashmir, Pathankot bad Amritsar ha Punjab, bad ha Pokhran ha Rajasthan. Ka jingiasiat, ka jur bha ha kane ka khyllipmat ha ki bynta jong ka LoC, ha north Kashmir district jong ka Kupwara, ha Samba, Poonch, Uri, bad ha Nowgam Handwara.
Ka jingpynlip ding lem bad ka jingpynpah siren, ka la jia ha Pathankot bad ha Jammu ha ka sien kaba ar mynta ka miet ruh, hadien ka jinghiar thma ka Pakistan, ha ki ktem jong ki shipai ha katei ka jaka. Ha Amritsar, la iathuh, ba ka don ka jingiasiat kaba jur bha bad ka don ka jingpynlip ding ha katei ka nongbah ruh.
U Omar Abdullah, myntri rangbah ka Jammu and Kashmir, ula thoh ha ka tweet jongu, ba u iohsngew dalade hi ia ka sur jingbthei kaba jur bha bad u la thoh “Ka sur kaba khlain bor bha, kaba lah ban dei na ka jingiasiat kaba jur bha, nga lah ban iohsngew na ka jaka kaba nga don manga” bad u kyntu ruh ia ki paidbah ha ki bynta ka Jammu ba kin shongkhop ha la iing.
Phi don ban ong eiei?