![](https://www.urupang.com/wp-content/uploads/2019/12/DSC00663-42.jpg)
Shillong: Ki 11 ngut ki nongshongshnong Huroi lem bad ka Khasi Students’ Union Huroi Unit ki dangbteng beit ban pyrshah ia ka jingker sainar shiah (Indo- Bangla Border Fencing) ha Huroi. Kine ki nongshongshnong Huroi kiba don jaka shapoh area shnong Lahaleiñ (Lailong) kim pat ioh ia ka jingsiew bai luksan (Compensation) na ka jingjulor ki jingthung jingtep na ka jingpyntrei ker sainar bad surok da ka National Building Construction Company (NBCC).
Lah ban pynkynmaw ba ka jingpynsangeh ia katei ka jingtrei da ki trai jaka lem bad ka seng ka long la lai sien lai wat, hynrei katei ka company ka thmu beit ban pyntrei jubor da ka jingbthah u DC.
Mynta ka sngi ruh, katei ka company ka mut ban iaid beit shaphrang ban pyntrei ha ka jingsynran ki pulit Umkiang, hynrei ki trai jaka kim ailad. Na ka liang ki pulit Umkiang ki la bthah ia kitei ki trai jaka ban ia kynduh shwa ia u DC, hynrei kitei ki trai jaka ki la ong ba la katno sien ngin leit mih sha ophis u DC, namar na ka liang jong u (DC) u la dep kren shai ba kitei ki jaka ba lah julor ka company ka la dep siew.
U DC u la maham ruh ia kitei ki trai jaka ba kim dei ban pynthut ia ka jingtrei, lym kumta un phah shipai ban leh da kaba tyngeh. Ha katei ka por ki trai jaka ki la ang lyngngoh ba shaei u DC u la siew ia katei ka pisa, mano ba wan shim, namar ma ki kim shymioh wat tang shi ana ruh. Ki trai jaka lem bad ka seng kin bteng ka jingpyrshah kat bympat ioh ia ka hok. Ki jingthung jingtep ki lah julor lut ki la jah rngai, ngim hun ban shu duh ei kumto ia ka hok.
Phi don ban ong eiei?