Dap da ki jaboh jabaiñ ha jrong slep iewduh, 1 bnai aipor u Myntri ia ki trai dukan ban pynkhuit

Shillong 08 Jymmang: Ka iewduh kadei kawei ka iew ka ba heh bad ka ba itynnad bha bamar baroh ki nongshong shnong jong ka jylla la jan baroh ki iawan ban thied jingthied shapoh iewduh, hynrei namar ka iewduh ka la kylla long ka iew ka ba jaboh tam ha kine ki sngi ba mynta namar ki paidbah ba shong iew kim shem la burom bad ieh khongreng ia ki niut ki nier hapoh iew khlem da pynkhuit.

Na ka liang U myntri badei  peit ia ka khuid ka suba hapoh iewduh, kata u Myntri War Tynghah ha ka step jong ka 08 Tarik Jymmang 2025, u la leit ban jurip ia ki dukan ha iewduh.

Ha kane ka jingleit jurip, u Myntri u la lap da la kijong ki khmat ba ladap satang da ki jaboh jabain suda ha jrong slep jong ki dukan ha iewduh bad ki kriah ha ka shu ieh khlem weng ia ki.

Ha ka jingiakren bad ki lad pathai khubor U myntri u la hukum ia baroh kiba dei trai ia ki dukan ha iewduh, la kalong ki Khasi ne ki bym dei khasi ruh, ba ki dei ban pynkhuid noh ia kitei ki jaboh jabaiñ ba la bret ha jrong slep.

U la ong ba kidei ban sdang pynkhuid noh mardor bad yn ai por ia ki hapoh shibnai bad lada kim lah ban pynkhuid ka ophis u syiem ka Hima mylliem kin sa leh da kaba tyngeh.

U la ong ruh ba kane ka jingjaboh ha jrong jong ki dukan ka long kaba isaitmet ban peit khamtam eh haba jaw ki um na ki slep ia ki paidbah ba iaid ha ieng ha ka por slap bad kane ka ktah ruh ia ka koit ka khiah ia kiba shong iew bad ia kiba wan thied ruh kumjuh.

U Myntri War tynghah u la bynrap da kaba ong ba mynta ka iewduh ka la khuid la suba haba iadei bad ki lynti iaid kjat namar ki dang maramot da ki maw sohra bad ka jingdro dur pynitynnad ia ka iew namar kata ka donkam sa ka slep jong ki dukan ba kan long kaba khuid khnang ban itynnad shuh shuh.

Ym tang ki kriah bad ki jaboh ba don ha jrong ki slep ha dukan ha iewduh, hynrei wat ia shyiap bad ki maw ha kaba kiba trei kontrak ia ki dukan ha iew kim shem la kum lut baroh bad ieh hajrong, ka ba la pynlong ia ka iew ba kan sa jaboh bha.

Kumta u Myntri War tynghah u la kyntu jur ba kin da lum bha bad pynkhuid bha ki tiar ynda dep pyntrei ia ki dukan bad lada lap ia kiba pynkhein yn sa pynshitom da ka ba tyngeh.