Dawa ka seng Congress, ban hiar shuki myntri u Ma Sniawbha

Shillong:Ka Meghalaya Pradesh Congress Committee (MPCC) mynhynnin ka sngi ka la dawa ïa u Symbud Myntri Rangbah ka Jylla u Bah Sniawbhalang Dhar ban hiar shuki khnang ban pynthikna ba ka jingtohkit kan iaid beit iaid ryntih bad kaba khuid ba suba bad kdew ruh ba ka Congress kam don bynta eiei halor kane ka jingkynnoh kumba la kren da u nongaiktien ka Sorkar Jylla.

Haba kren sha ki lad pathai khubor u nongialam ka Congress, u bah Manuel Badwar u la pynpaw ia ka jingsngew khia halor ka jingtan lang u bah Paul Lyngdoh ia ka kyrteng ka Congress ha ka jingshah kynnoh u Symbud Myntri rangbah u bah Sniawbhalang Dhar, ha ka HNLC.
“Nga kdew hangne ba da ka long kumno kumno ruh ngan kren shai ba ka party kam don bynta eiei halor kane bad lada ka dei kata ka jingkynnoh ka HNLC ka dei ka sorkar MDA bad u bah Sniawbhalang Dhar ba kin shim ia ka rai ban hiar shuki na ka jinglong myntri khnang ba ka jingtohkit kan iaid beit” u la ong.
Kane ka jingdawa hiar shuki ïa u Symbud Myntri Rangbah, u Bah Sniawbhalang Dhar ka wan hadien ba ka jingshah kynnoh donkti ban bei tyngka ia ka sengkieng atiar Hynniewtrep National Achik Council (HNLC) ha ka por ba u dei Myntri Sorkar Jylla ba ïalam da ka seng Congress.

“Ka Congress ka sngew ban pynpaw ka jingsngew diaw halor ki khubor kiba la kynnoh ba u Bah Sniawbhalang Dhar uba dei u dkhot barim ka Congress, u la donkti ban bei pisa ïa ka sengkieng atiar ka HNLC.
Ka Congress ka kyntait ïa kano ka jingkynnoh hynrei lada ka jingkynnoh ka long shisha, kine ki dei tang ki kam shimet jong u Bah Sniawbhalang, ym da ka jingia tip lang ne mynjur da ka Congress Party”u la ong.
Haba iadei bad kane ka jingkynnoh, ka MPCC ka dawa ban tohkit da ka kynhun laitluid mardor. “Ban pynthikna ia ka jingkhuid jingsuba bad ban weng ia kino kino ki jingwan tuklar na ki bor Sorkar, ngi dawa ba u Symbud Myntri Rangbah ka Jylla u dei ban hiar shuki katba dang iaid ka jingtohkit” la ong ka kyrwoh na ka MPCC.

Ka MPCC ka la ong ruh ba ka Congress ka pynrem ia kano kano ka jingiadei jong ki sengsain pyrthei, ki riew shimet ne ki Myntri Sorkar bad ki kam be-ain ne ki kam pyrshah Ri bad ka la pynpaw ba ka Congress ka kloi ban iatreilang bad ki bor Sorkar naka bynta ka jingtohkit khnang ban pynthikna bad ban wanrah iaka jingbishar hok.
“Ka MPCC ka iai neh ha ka jingshimkhia jong ka, na ka bynta ki paidbah ka Meghalaya, da kaba pynneh ia ka jinglong ba janai bad ka jingsynshar kaba don ia ki nongrim” ka la ong.