Shillong 15 Iaiong: Ka Hynniewtrep Youth Council (HYC) sengkmie ha ka sngi baar ka 15 Tarik Iaiong 2025, ka la leit ban iakynduh ia u MP ka Rajya Sabha u Dr. Kharlukhi ban buh da ka dorkhas bad ban iakren halor ka thungkam thungkam ha NEIGRHIMS Hospital, Shillong.
Haba iakren bad u president ka seng u bah Roykupar Synrem u la ong, ba Ka seng ha kine ki taiew baladep ka la leit ban iakynduh ia ki nongpyniaid jong ka NEIGRHIMS ban rah ia ki mad bapher bapher ban dawa pynbeit ia ka rukom thungkam thungkam.
Ha ka jingiakynduh ka seng ki nongpyniaid ka NEIGRHIMS ki ka ai ia ka jubab ka bym pynhun ia ka seng, ka ba pynlong ia ka seng ban iakhih hakhmat ka ophis treikam Jong u Director ka NEIGRHIMS.
Kine ki mad ba ka seng ka shim, kim shem dei ki mad tang jong ka seng, hynrei kidei ki mad ki ba ktah ia ki khun samla bad ia ki nongshong shnong jong ka jylla hi baroh kawei.
U la ong, ba ngi don ia ki nongmihkhmat ban kren na ka bynta jong ngi hapoh Delhi bad ban iakren na ka bynta jong ngi ia ki bor sorkar, hynrei kita ki nongmihkhmat kim shem la kren eiei.
Ka seng ka ladep phah ia ki jingthoh sha u MP ka Lok Sabha u Dr.Ricky AJ Syngkon bad ia u MP ka Tura u Saleng Sangma ban shimkhia ia kane ka kam bad ruh mynta ka sngi ki la iakynduh sa ia u MP ka Raya Sabha khamtam namar u dei u MP na ka party Sorkar ba un kren ia kine ki mad ba ka seng ka la buh.
U bah Roykupar ula ong, ba ka seng ka la buh shakhmat ia ki jingdawa, kalong ba dei ban thung 80% ia ki Nurse Kynthei bad 20% ia ki Nurse Shynrang, ha ka ba baroh ki tnad treikam Jong ka sorkar India ba ki lah ban shimrai ban pyntreikam ia kata ka 80% la 20% kumno pat ha jylla jongngi kim lah ban pyntreikam ia kane.
Ka seng ka la pyrshah jur ruh ia ka jingong jong u Director ka NEIGRHIMS, ba ym shem don ki tnad treikam Jong ka sorkar India ban pyntreikam ia ka 80% lane 20%. Kumta mynta ka sngi ka seng ka la phah ka jingthoh sha u MP ka Raya Sabha ba baroh ki tnad treikam Jong ka sorkar India ki la ban pyntreikam hynrei tang ha NEIGRHIMS ym lah ban pyntreikam ia kane ka 80% lane ka 20%.
Ka jingbymkwah ban pyntreikam u Director ka NEIGRHIMS ia kane kadei namar ba lehse u kwah ban wanrah khambun shuh shuh ia ki Nurse Shynrang hapoh NEIGRHIMS Hospital kumba la jia ha kine ki snem ba ladep, la ong u bah Roykupar.
Shuh shuh u ong, ba ka seng ka kren da ka bashai ba kam kwah ba kane ka thungkam thungjam mynta kan thung bun da ki Nurse Shynrang ne ha kine ki snem ban dangwan.
Kumta ka seng ha ki jingthoh ba ki phah sha baroh ki MP, ka la kyrpat ba kidei ban shimkhia ia kane ka kam.
Phi don ban ong eiei?