Ka dorbar Parliament, ka dang shu kut ha ka 20tarik Nohprah 2024, hynrei kaba sngew bynniaw ka long ba ki ishu jong u paidlang ka ri Khasi Jaintia, ym shym la iakren eiei ruh em ha katei ka dorbar, kaba dang shu kut shen, lada dei ha Lok Sabha ne ha Rajya Sabha ruh kumjuh.
Ngi dang shu iohi, ba kumno U MP jong ka seng Congress na Manipur, ula khyrwit tyngeh ia ka jingleh niewbein jong ka sorkar BJP, ia katei ka jylla, kaba tuid lynter da ki ummat snam haduh ha kine ki sngi, na ka jingiakynad jaitbynriew bad ba u da nud ruh ban buh jingkylli ha ka dorbar Lok Sabha, da kaba u ong “La ngi dei ne em ki nong India?”.
Hynrei haba ngi peit pat ia ki mat jong u paidlang Khasi Pnar, la iohi, ba ym don mano mano ruh ba leit tied jingkhang ha ka dorbar bah Lok Sabha ne ha Rajya Sabha bad katei ka pyni, ba ngim don satia ia kino kino ki jingeh kiba ngi dei ban ther ha khmat jong katei ka dorbar bah jong ka India.
Da la ki jong ki khmat, ngi iohi, ba kumno ki kam thombor ban pyn iashut ia ka jingsngew niam bad sngew jaitbynriew, ki la sdang ban leh niewbein ia u khun khasi khara bad ka jingsdang ka dei lyngba ka jingwan u sadhu ban pynbor iangi, ban dei kmie ia ka masi bad kumta katei ka dei ka ishu kaba jaboh haduh katta katta, ha kaba U MP, ula dei ban dawa, ban niew beain ia katei ka seng, kaba kwah ban nion bein ia ngi ki rit paid bad nangta sa ka kynhun shitniam, kaba na Assam kaba kwah ban kam trai ia ka krem Mawjymbuin bad katei ruh ka dei ban long ka ishu kaba triem bha ban ia khyrwit ha Lok Sabha.
Kam dei tang kata, la iohi, ba kumno ka sorkar Assam, ka la pynkhein ia ka hok longbriew jong u khun Khasi, uba don da ki lak ngut ha katei ka jylla, da kaba ka khang ia ka jingpynlong jingialap niam bad ba ka khang sa ia ka jingbam doh masi bad katei ka dei ka mat, kaba la dei ban ia tied miej ha Parliament, namar ba ka sorkar BJP ha katei ka jylla, ka la dkhat ia ka hok jong u khun Khasi ban mane blei bad kumjuh ban bam ia ka jingbam kaba ki bang baroh shi katta.
Kam dei tang kata, ngi iohi, ha kine ki sngi, ba ka la mih sa ka jingkhang ia ki iew khappud, ka jingkhang ia ka khaii pateng bad ka Bangladesh, kaba la ktah ia ki lak ngut ki nongshong khappud bad kumjuh ia u paidlang ka jylla hi baroh kawei; hynrei katei ruh kam shym la mih ha ka jingiakren ha katei ka dorbar bah jong ka Parliament bad kumta lada kine kiei kiei kim shym la paw ha ka rynsan jong ka Parliament, kumta ka pyni ba u paidlang ka Khasi Jaintia, u shu phah nongmihkhmat sha Lok Sabha, khlem kino kino ki ishu kiba kongsan.
Ngi iohi ruh ba U MP jong ka Rajya Sabha, u pyniaid shait shait ia ki skhim jongu, da kaba u leit ot ribon ha ki katto katne ki jaka bad haba ka long kumta, ka wan ruh kajuh ka jingkylli, ba kumno U MP jong ka Shillong, haba ula jan dap snem, um pat pynbna satia, wat tang iwei i MP skhim ruh, haba katei ka dei ka skhim kaba la sam antad kumba T.5 klur ha ka shisnem.
Phi don ban ong eiei?