Ka roster system, kam shym la dei satia ka ishu, kaba shongshit ha ka elekshon MLA 2023, hynrei, kaba lyngngoh, ka long ba mynta pat, ki ia tip lut ia katei ka roster, naduh u khynnah skul, haduh ki nongiew bad khamtam ki riew sain pyrthei bad ngim tip, ia kaei ka jingmut kaba don ha ki paidbah, namar ba lada iakren roster, ka dei ha iing dorbar jylla bad kam dei satia ha surok, lane ka dei ha ka elekshon MLA bad kam dei satia, na bynta ka elekshon MP, MDC.
Wat la katta, hap ai khublei ia U Conrad Sangma, myntri rangbah ka jylla, ba ula leh ia kaba bha tam bad kata ka long, ba ula kohnguh ia kawei ka mat bad kata ka long ba ka roster ka dei ban iaid shakhmat bad kam dei ban iaid shadien bad nalorkata, ula rai ban phah sangeh lut ia ki jingthung kam, katba ka komiti, kam pat lah ban ai ia ka kaiphod jongka, ha kaba yn khlieh da ka kong Ampareen Lyngdoh, myntri Cabinet jong ka sorkar Jylla bad katei ka dei hi ruh ka ishu, kaba la ia thad ha surok, ha ki khyndiat bnai ba ladep, ha kaba baroh ki seng sain pyrthei, ki la kren shai, ba ka roster, ka dei ban iaid shakhmat bad kam dei satia ban iaid shadien bad ki don ruh kiba dawa, ban sangeh ia ka jingthung kam, katba ym pat lah ban pynbeit ia ka roster.
Mynta haba ka sorkar jylla, ka la mynjur ia katei ka phang, kumta kaba donkam, ka long ba ka komiti kan pynstet ia la ka jong ka kam bad ban iaid shakhmat ha ka jingthung kam ha ki tnat bapher.
Kam kut tang katta, ka wan ruh ka jingdawa, na ka bynta ban pynbeit thymmai ia ka reservation policy bad katei ka dei sa kawei pat ka mat, kaba sngewtynnad ban iakren bad haba ka dei kumta, ka sorkar jylla, ka la dei ban buddien ia ki rai kiba rim, kiba dei halor kane ka ishu bad ka la dei ruh ban ioh jingmut na ki seng sain pyrthei, ki sengbhalang bad ki kynhun trai shnong jong ka jylla, na ka bynta ban ioh ia ka rai kaba pynhun ia ki Khasi,Jaintia, Garo.
Kane ka dei ka bhah, kaba la treikam la 50 snem kynthih (wat la ka la noh shiliang ha kine ki 50 snem ba ladep), hynrei, haba ka la mih ka jing iakren, na ka bynta ban pynbeit noh ia ka, ka dei ia ki nong mihkhmat paidbah bad wat ia ki sengbhalang, ba kin shim ia ka lynti kaba pynhun ia baroh, kumba la thaw ha u snem 1972, khlem da pynsngewsih iano iano.
Phi don ban ong eiei?