Mano ba dei bad mano ba lait ia ka tyngka pliah ba T.5hajar?

Ka ju don ka jingong, ba haba ki ia tur ki masi kyrtong, kumta ki ju iap ei ki phlang bad katei ka la paw shai ha kane ka kynti, ha ka jing iashut jong ki heh ka seng BJP bad ki heh jong ka seng NPP, PDF, ha kaba iadei bad ka jingsam pisa kaba T.5hajar sha ki riew paidbah.

Ha ka jingshisha, katei ka pisa ruh kam dei hi ban ong ban iarap nongrep, namar katei ka dor, ka la pynpoh jait lypa, ia u nongrep bad kata ka long, ba lada ka jing iarap kan long tang 5 hajar, kaba mut, ba kan dei ka dor jong kumba ar nat u kwai lane shi powa kwintal u synsar sha Riwar; hynrei, lada katei ka pisa, ka thew ia ki nongrep piskot ne kubi te ioh lehse, ka lah ban kham heh, namar la ju iohi, ba ka dor jong u piskot bad u kubi, ka shongdor 2,3 tyngka shi kilo, lane ar hajar, na ka bynta shi kwintal.

Kaba kongsan, ka long, ba u paidlang ka jylla, un ia shai bha bad kata ka long, la katei ka pisa kaba T.5 hajar ka dei ka ram ne ka dei kaba shu ai ei bad lada ka dei kaba shu ai, ka dei ban don ka daw, balei ba la ai ei ia katei ka pisa kaba 5 hajar shi khlieh briew bad lada ai ei, dei ban ai ia baroh khoit u nongthep vote ka jylla, uba lah ban don kumba 18lak ngut antad, ha ka elekshon 2023 bad kam dei ban ai, tang sha kito kiba la shah pynbiej, ba kin thep vote biang, ia uto U MLA.

Na ka jingkren u heh BJP, u kynnoh, ba katei ka dei ka ram bad lada ka sut, ka long 5 percent, kumta u nongioh, un hap siew T.250 shisnem bad lada jia ba kam dei pat ka ram, ka sorkar jylla, ka dei ban sei madan ia ka hukum, kaba da ka jingthoh ban pynshai sha uba bun balang, ban pyni, ba kata ka FOCUS, ka dei ka skhim ioh ei bad ka daw, kaba don ha lyndet ka jing aiei.

U paidlang ka jylla, u tip bha, ba ka BJP, ka dei ka hynmen rangbah jong ka NPP bad ba U Conrad Sangma, u la shu kohnguh lypa, katba ong U Narendra Modi bad U Himanta Sarma bad kumta, haba ki kren ki nongialam jong ka seng BJP ruh, u paidlang ka jylla, u ju pynshah shkor bha, namar la shim, ba ki kren ia ki jingshisha bad U Conrad Sangma, u dei ban sngewthuh, ba ka jingkren U Bah Ernest Mawrie, ka la pynktha khlieh, ia u paidlang ba bun ka jylla, la kin shim ne em ia katei ka pisa kaba T.5 hajar bad kumjuh ruh ia ka skhim, kaba shu sam maphot ia 4 tylli ki sniang.