Pleng, ki nia elekshon, dei ki nia kai suda?

Tang ka elekshon Sohiong ruh kam pat kut bha, ka la paw pyllein, ba ka jingkren kob jong U bah Prestone Tynsong, ban weng ia ki UDP na ka sorkar, kumba ka dei pleng tang ka nia pynbieit briew, lane ha kawei ka kyntien, ka paw, ba ka dei tang ka nia shimet jongu, ha kaba wat U Ma Sniawbhalang Dhar, uba dei hi u symbud myntri rangbah ruh um pdiang satia.

U Ma Sniawbha, haba kren sha ki kotkhubor, u kam, ba ka jingkren ban weng ia ka UDP, ka dei tang ka jingkren elekshon bad haba ka long kumta, ka mih ruh ka jingkylli, ba lada ki kyrtong lane ki seng sain pyrthei, kim pyn urlong ia kaei kaba ki kren elekshon, kumta kaei pat ka jingkren, kaba kin pynurlong bad katei ka jingkren jong utei u symbud myntri rangbah, ka la pynpohdor hi khait, ia baroh ki jingkren jongu ne jong kiwei pat ki heh NPP, haba ki leit ban kanbas elekshon sha Sohiong ne sha kiwei pat ki jaka bad kam dei tang katta, hynrei, ka la long ka jinglehrain kaba khraw, khamtam ia u kyrtong jong ka NPP, uba ialeh na Sohiong Constituency, lada u shim ba ki jingkren jongu ruh, ki dei hi tang ki kam pynbieit briew bad kim dei satia, kiba wan na ka jingthmu ba shisha.

Ngim tip shuh, ia kaei ka jingsngew jong ki nong Sohiong, lane jong u paid ka jylla, halor kane ka jingkren jong U Ma Sniawbha; hynrei, lada ki nong ialam, ki kren da kitei ki jait kyntien, ka pyni, kumba ki paidbah, kim don dor eiei pleng, ha ki jingleit ialum jongki, sha ki jing ialang elekshon, na ka bynta ban sngap ia ki kyntien jong ki nong ialam, namar ba ki dei tang ki kyntien kiba shu thok bad shukor bad ka dei ruh na katei ka daw, ba ki paidbah, ki ieid ia katei ka party, tang ha ka por ba shongshit, hynrei, ynda ki la leit phai sha iing bad ngam jylliew, ia ki jingkren bapher, ki sa kyndit bynriew bad dei na katei ka daw, ba ha Khasi hills, katei ka seng, ka shu jop salit ha ka sien ba ladep.

Ngin dang ia tip, ha ka sngi Saitjain, ia ka result jong ka elekshon ha Sohiong; hynrei, ngi la iohi, da la ki jong ki khmat, ba ka jing iakren ha katei ka Consti tuency, ka dei ka jingkren riewkai suda bad katei ka long kaba sngewdiaw shi katdei eh, haba ka jaitbynriew, ka don ha kaba kum kane ka saw ka sian, halor ki ishu ba ngi ia tyngkhuh ha kine ki sngi.