Sait khuid ialade, tei pop ia ki kotkhubor

Halor ka jingweng kyrtong MDC ha Nongstoin, ka la mih ka jingshah kynnoh jong kawei ka lad pathai khubor, ha u bah Ardent Basaiaw moit, nongialam jong ka seng VPP, ba katei ka dei ka khubor kaba shu thok lane ka fake news bad la iohi, ba utei u nongialam jong ka seng trai ri, kaba heh duh ha ka jylla, ula byrngem ban tan ia katei ka lad pathai khubor sha ka kashari jong ka Press Council of India (PCI).

Hynrei ka jingshisha, ka long pat, ba katei ka khubor, ka la kylla long noh kaba shisha bad ba katei ka seng sain pyrthei, ka la weng shisha ia utei u kyrtong bad kumta, utei u nongialam jong ka seng, ula dei ban tan hi sha ka PCI bad ha kane ka kynti, kam dei shuh, ba ka dei ka khubor kaba thok, hynrei ka long ba katei ka khubor, ka la pynlong ia ka seng, ba kan shim ia ka rai kaba shu thombor bad leh pyrshah ia ka hok longbriew jong u kyrtong na Nongstoin.
U Bah Ardent Basaiawmoit, ula dei u nongialam uba la ih bha bad ula long MLA bunsien bad ula long MDC bad ula long CEM ruh shipor, hynrei kane ka jingkren bein ia ki kotkhubor kam dei ha ka sien kaba nyngkong bad ha shwa ka elekshon MP ruh, ula ther tyngeh ia ki kotkhubor ba ki pynmih tang ki khubor kiba siew pisa lane ki paid news bad kane ruh ka la pynmih ia ka jing ia pyneh kaba shipor bad ki kotkhubor kiba rit bad kiba la pynmih da ki para ri hi ha ka jylla.

Kane ka jingbyrthen jong utei u nongialam ka ailad ia ki riew paidbah lane ia kito kiba ieid ia katei ka seng, ba kin nang shim kabu ban kren jot ia ki kotkhubor Khasi lane ki video channel, ha kaba ki pynmih ia ki jingkynthoh, ia ki lad pathai khubor, la kum ia ki mrad kynsha aiu re bad ba ki la don ruh ki jing kynshoit ba kin nym pule shuh ia kitei ki video channel, ki kotkhubor bad kumta ter ter; katba kaba sngewsih ka long ba ia ka India Today, ka telebishon phareng kaba na New Delhi, kim nud ban ang tang shi kyntien ruh, haba ka ai khubor ba U MP jong katei ka seng, u don sha ka liang jong ka NDA, ha ka por ba jied ia u lamphang dorbar Lok Sabha bad kane ka jait jingkren bein ia ki khubor na ka jylla, ka pynlong ba kin kiar pynban ia ki khubor jong katei ka seng, namar ba ki shah pyntieng pynsmiej bad kan pynshlur ia ka India Today bad kiwei ki khubor heh, ba kin thoh katba mon, namar ba ia ki, ym nud ba nud satia ban saham.

Ka khubor jong u batesi TV, ka pyni, ba ka dei kaba shisha bad kumta ka hok bad ka shi kyntien ka ieng ha kaba kut bad katei ka pyni ba katei ka lad pathai khubor, ka la ioh ban rung haduh ha ka jabieng pyrkhat kam jong ki nongialam ka VPP, kaba dei ka tnat treikam kaba halor duh jong katei ka seng bad kane ka dei ban long pynban, kum ka nongmuna ia kiwei ki kotkhubor, ba kin long kiba tih bniah, kiba don ia ki jingshisha ha kti bad ba kim dei ban tieng ne smiej ia kitei ki jingkren kob jong ki riew sain pyrthei, kumba la byrthen da u heh duh jong ka VPP.

Ka ju long ruh ka jingshisha, ba ki riew sain pyrthei, ki ju mlien bha ban tei pop ia ki kotkhubor, haba ki bakla kren bad kim ju pdiang ia kaei kaba ki la leh ne kren bakla bad kane ka dei kawei na ki dak kiba sniew bha, namar ba kine ki jingkynnoh, ki plie lad ia ki riew pyntriem ba kin pynhiar kput ia ki nongthoh khubor.