Shillong:U Kiran Thapa bad kiwei kiba shong ha Shillong Cantonment ha ka No.48 JB bad nangta sa kiba shong ha ka Sy.No.135/77, nangta U Sajan Kumar Geonka ba la mihkhmat da ka Santosh Devi Geonka, nangta ka Shillong Cantonment Lease Holders Association, ki la ujor pyrshah ia U Secretary Defence jong ka sorkar India bad kumjuh ia ka Shillong Cantonment Board lem bad kiwei, ha kaba ki la mudui sha Meghalaya high Court bad ka mat, ka dei halor ka jingdon ka jaka kaba heh bha, kaba la long trai da ka tnat iada ri bad kaba la aiwai da ki spah spah snem bad katei ka bai wai, la ju pynkylla da ka sorkar bad ha katei ka jingpynkylla, la lap ba haduh U Lber 2022, ka bai wai, na ka bynta 3hajar square feet lane 300 square metre ka long tang T.3 shibnai bad halor kane ka don ka rukom khein jong ka tnat iada ri, kaba ki khot kum ka Standard Rent Determination.
Ha ka 17tarik Jylliew 2022, ka Shillong Cantonment Board, ka la phah ia ka shithi pan pisa, na ka Bala Krishna Thapa, kaba shong ha ka No.49 JB, Sy No.135/74, ha kaba ka la pyntip, ba yn kyntiew noh ia ka bai wai, naduh ka 1tarik Iaiong 2022 haduh U Nohprah 2022. Kat haduh ka 1tarik Lber 2022, ka bai wai ka long T.3 na bynta katei ka jaka baroh kawei, katba ha katei ka dor thymmai, la kyntiew ia ka bai wai, kaba long T.1,18,823 bad kaba long T.13hajar shibnai.
Kawei pat ka shithi, ka leit sha U Madan Thapa, uba shong ha ka number 37 JB Sy No.135/88 bad na bynta U Thapa, la pan ia ka bai wai, kaba long T.4,74,425.00, na ka bynta ka 1tarik Iaiong 2022, haduh ka 31tarik Nohprah 2025 bad hangtei ka pyni, ba ka bai wai ia katei ka jaka, ka long T.1,15,146 na ka bynta U Iaiong 2022 haduh ka 31tarik Nohprah 2022 bad nangta la kyntiew sha ka T.1.53,528.00, naduh ka 1tarik Kyllalyngkot 2025 haduh ka 31tarik Nohprah 2025. Nalor kitei ki don sa shibun kiwei, kiba ioh ia kitei ki shithi bad ki nong ujor, ki pyni, ba katei ka dei ka jingbakla ha ka rukom khein ia ka dor bai wai bad ba kim lah satia ban siew ha katei ka dor.
Kine ki nongujor, ki la ujor kham mynshwa, ha khmat jong uwei u nongbishar, hynrei la pynkut noh ia katei ka mukotduma, ha ka 5tarik Jylliew 2024.
Mynta ka la wan biang ka jingujor ba ia ka Standard Rent Determination (STR), la shim naduh ka 31tarik Kyllalyngkot 1976, kaba la pynmih da ka Ministry of Defence.
U Dr N Mozika Deputy Solicitor General jong ka sorkar India, u iathuh ba ia ka bai wai, la khein katba kum ka dor iew bad ba ha kitei ki iing jong ka Defence la khein 2.5pc na ka dor iew.
Ha kaba iadei bad katei ka mat, ka kashari jong U bah W Diengdoh, judge bad U IP Mukerji, Chief Justice, kim shym la kyntait ia ka rai, ba la dep rai da uwei u nongbishar ha u snem 2024 bad ki la bthah ia kito kiba shim wai, ba kin nang siew noh 40 percent jong ka arrear, kaba la buh dor, haduh ka 31tarik Jymmang 2025 bad ba kin siew ha shwa ka 31tarik Nohprah 2025 bad ynda ki la siew pura, kumta ia ka dor yn sa pynbeit bha; hynrei lada kim siew, kumta na ka liang jong ka Defence Ministry, ka lah ban shim ia kano kano ka rai kaba ka sngew iahap.
Phi don ban ong eiei?