Ha Gambegre, ka NPP ka jop da ki kam pynroi, ym da ka pisa, ong u Conrad

Shillong:U myntri rangbah ka jylla u Conrad K Sangma ula ong ba ka Gambegre konstitwensi ka dei kaba jwat tam ia ka NPP ban jop elekshon ha ka rilum Garo namar ba ka NPP kam shym la lah ban jop ha ki saw tylli ki konstitwensi.

Kane ka dei ka sien ba nyngkong ba ka NPP kan ioh ia ka jingjop na kane ka konstitwensi ha kane ka elekshon shiteng samoi.
Haba kren mynta ka sngi sha ki lad pathai khubor, u Conrad ula ai khublei ia ki paidbah ka Gambegre kiba la ai ka jingshaniah ia ka NPP ha kane elekshon.
Halor ka jingioh bun paid ka NPP marwei sha ka 32 ngut ki MLA, u Conrad u la ong ba ka NPP kam ym beh ia ki paralok ha ka MDA-2 hynrei kan bteng ban iatreilang haduh ban kut ka samoi kumba la iateh watla ka don ka jingpynbor ban beh noh ia kiwei ki party.

Ki paralok kiba don ha ka MDA-2, ki kynthup ia ka UDP 12 ngut, ka BJP 2, HSPDP 2, bad ki MLA shimet.
Ha kajuh ka por, u myntri rangbah ka jylla uba dei ruh u President ka NPP, ula kam ba ka jingjop ka NPP na elekshon shiteng samoi na Gambegre, kam dei na ka bor pisa kumba la kynnoh kiwei ki party, hynrei ka dei namar ba ki kam pynroi ba ka la pyni bad leh sha ki paidbah.
Haba kren mynta ka sngi, u Conrad u la ong ba kane ka elekshon ha Gambegre ka dei halor ka kam pynroi namar ba ka Gambegre ka dei kawei kaba sahdien tam ha Garo Hills bad ki paidbah ki kwah ia ka jingkylla bad na kane ka daw, ki jied ia ka NPP na ka bynta ki kam pynroi.

U la ong ba ka sorkar kam ym jied shiah haba ka leh ne wanrah ia kano kano ka kam pynroi hynrei ka leh na bynta ki paidbah ka jylla. U la ong ba ki don 7 hajar ki nongkyndong ha ka jylla bad kam long kaba suk ia ka sorkar ban leh khlem ka jingiasyllok lang bad ki MLA.
U myntri rangbah u la ong ba kam don kano kano ka jingleh shiliang bad ka sorkar ka kwah ban kyntiew ia baroh ki jaka ha ka jylla.