Bhopal: Ka skul ha Shahdol District jong ka jylla Madhya Pradesh, ka la pynkyndit ia ki bor sorkar jylla, haba ki la don haduh 168 ngut ki nongtrei bad 65 ngut ki misteri, ba kin ai rong ia saw litar ka rong, ha kawei ka kynroh jong kawei ka iing skul sorkar, ha ka shnong Sakandi.
Ka jingkhein, kaba la ai na ka Byohari Assembly, ka la khluit tar ha ka internet, haba la pyni, ba la pynlut ia T.1.07lak, na ka bynta ban airong ia 4 litar ka rong ha ka kynroh jong ka skul ha Sakandi bad nangta sa kawei pat ka skul kaba ha ka shnong Nipaniya, ka jinglut ka long ar shah kaba long T.2.3lak bad katei ka dei ban ai rong ia 20 litar ka rong ha ki jingkhang iit jong ka iing skul.
La pyni ha ka jingkhein, ba ki don 168ngut ki nongtrei bylla bad 58ngut ki misteri kiba trei ia ka kynroh jong ka skul ha Sakandi bad sa 275ngut ki nongtrei bylla bad 150 ngut ki misteri, na ka bynta ban airong ia shiphew tylli ki jingkhang iit bad sa saw tylli ki jingkhang bah.
La pyntrei ia katei ka jingtrei da ka kompeni Sudhakar Construction, ha kaba la shna ia ka bill, ha ka 5tarik Jymmang 2025 bad shwa kata, la leit peit ia ka jingtrei ha ka 4tarik Iaiong 2025, da u principal jong ka Nipaniya school.
Phi don ban ong eiei?