Nongpoh: Ki heh nongialam ka KSU, North Khasi Hills District, kaba la lamkhmat da u Samla Ferdynald K. Kharkamni, President, nangta u Samla James H. Mawphniang, General Secretary lem bad kiwei, hynnin ka sngi ki la leit ban kynduh ia ka Kong RM Kurbah, DC Ri Bhoi, da kaba phah ruh da ka dorkhas, ban pynpaw ia ka jingsngewbitar eh halor ka jingiai mushlia bad pynthut ka sorkar Assam lyngba ki jaidbynriew Karbi bad Nepali ha kito ki shnong Khasi, kiba don ha khappud bad kiba hap hapoh ka Raid Nongtung.
Ha ka dorkhas kaba ki la phah sha ka DC Ri Bhoi, ia kaba la soi da ki heh ka KSU ha Ri Bhoi, ki la pynpaw ba ka daw hi kaba la pynlong ia ka Assam ba kan ioh ban leh katba mon ha kito ki shnong khappud kiba hap hapoh ka Raid Nongtung, ka dei namar ka jingmutlop bad bym shimkhia da ki bor kiba deipeit ia ka Meghalaya, kaba la pynlong ia ka Assam ba kan nangshlur ban pynthut katba mon ha ki shnong khappud.
Lyngba katei ka Dorkhas, ka KSU ka la kyntu ia ka DC Ri Bhoi, ba ka dei ban shimkhia mardor halor ka jingpynsangeh ka sorkar Assam, lyngba u Rupsing Teron, MLA Chingtong Baithalangso Constituency, ha ryngkat ki sengbhalang na Karbi Anglong bad Nepali, kiba la wan ban pynthut ia ka jingpyntrei ia ka skhim Jal Jeevan Mission (JJM) ka jylla Meghalaya ha ki shnong jong ka Ummat kaba la jia ha ka 6 tarik mynta u bnai, ha kaba kitei ki briew na ka Assam, ki la nud wat ban kurup ia ki pipe bad pynsangeh ban pyntrei na bynta ka bha ka miat jong ka jylla Meghalaya.
La pynpaw ruh,ba ka jingiai thombor ki briew ka Assam ha ki shnong kiba don ha katei ka thain, kam dei shuh ka sien ba nyngkong, hynrei ka dei kaba la ju iai jia na ka por sha ka por, ha kaba ki shnong kiba don ha katei ka thain, ki ju shah pynthut beit man ha ka por ba ki ioh ia ki skim pynroi na ka sorkar jylla bad kaba la pynduhnong shikatdei eh ia ki shnong kiba don ha katei ka thain kaba hap hapoh ka Raid Nongtung.
Ha ka dorkhas, ki heh ka KSU, ki la buh jingkylli sha ka sorkar jylla bad ruh sha ki Khlieh Nongsynshar ka Distrik, ba aiu ki leh halor ka jingiaibteng Assam ban tei ia ki kam pynroi ha ki shnong kiba don ha katei ka thain, kiba kynthup ia ka Stadium ha shnong Umlaper kaba ki la dep ban trei, ka Wall Fencing jong ka Stadium ba dang bteng haduh mynta, ka Wall Fencing jong ka Forest Department ha shnong Madan Umwang kaba dang pyntrei mynta, ki surok ka Assam ha katei ka thain lem bad shibun kiwei ki kam pynroi jong ka sorkar Assam bad ka Karbi Anglong Autonomous Council, kiba dang iaid shaid shaid haduh mynta mynne.
Ha kawei pat ka liang, ka KSU, ka jingkylli balei ki khlieh Nongsynshar ka District ki shu sngap bad kuman halor ki kam thombor ka sorkar Assam, kiba kynthup naduh ka jingdon sah ki pulit Assam ha Umlaper bad Umru, kaba la pynthut eh ha ka leit ka wan bad pynrit mynsiem ia ki paidbah Khasi. Nalorkata ka jingshah pynpra ia ka Khlieh Umwang L.P School bad jingshah pynsangeh trei ia ka Madan Umwang LP School, kaba kum ka seng ka la dawa ban pyntrei noh, hynrei haduh mynta ym pat leh ei ei bad kaba la pynjynjar eh ia ki khynnah Skul.
Ka KSU, ka la pynkynmaw halor shibun ki kam leh donbor ka Assam ha ki shnong ha katei ka thain, kiba kynthup ia ka jingshah pynpra ia ka iing dorbar lem bad ia kawei ka iing baduk kaba la tei lyngba ka skim PMAY ha shnong Umru.
Ka KSU lyngba kitei ki nongialam na Ri Bhoi, ka la ther ruh ia ka sorkar jylla, da kaba ong ba ka Meghalaya, ka shu rieh tngen ha kata ka Status qou hapdeng ka Meghalaya bad Assam, da kaba burom sah ruh ia ka, hynrei haba iadei bad ki kam pynroi bad jingshah nion bein, ka pynkylla langknia ia ki paidbah kiba sah ha khappud.
Namarkata, halor kitei ki nongrim ba la kdew haneng, ka KSU ka la pynpaw ba kam lah ban shu sngap kuman halor kitei ki jingjia bad iai mushlia ia ki paidbah ha katei ka thain, namar ia baroh ki kam pynroi ka sorkar jylla la hap shu pynsangeh lut baroh.
Phi don ban ong eiei?