Haba jied nongmihkhmat, ngi dei ban jied da ki briew kiba lah ban long kum ki nongialam

Albert Maring,
Umdap Dumu, Ri Bhoi District

Haba jied nongmihkhmat, ngi dei ban jied da ki briew kiba lah ban long kum ki nongialam, ngi dei ban jied da ki briew kiba don ka sap nongialam, ban ialam ia ki paidbah ha ka synshar ka khadar, ha ka imlang ka sahlang ban long ki nongprat lynti, ki nongsaindur na ka bynta ka lawei ba phyrnai ha ka imlang ka sahlang lyngba ka synshar ka khadar, la ka dei hapoh ka Autonomous District Council ne hapoh ka iing dorbar thaw ain ka jylla bad jong ka ri India ruh kumjuh.

Ngi donkam ban jied bad ban ioh ki nongmih khmat, ki nongialam kiba stad kiba shemphang bad kiba lah ban shimti kum ki nongialam ha kano kano ka por ba ka jylla ka ri bad ka jaitbynriew ka donkam, ban long ki nongialam kiba iohi jngai, kiba sngew thuh bad kiba tip lypa ia ki jingeh bad ki jingdonkam Jong ki paidbah ha baroh ki liang, la ka dei ha ka riti ka dustur, ka synshar ka khadar bad kumjuh ha ka roi ka par, ka ioh ka kot Jong ki paidbah.

Ka kam Nongmih khmat, ka kam nongialam kam dei ka kam khyllung khynnah ba lah ban jied katba mon katba sngew bit, ngi dei ban jied da ki briew kiba kynsai , kiba don ka jingkitkhlieh bad kiba don ka sur ban kren na ka bynta ki paidbah hapoh ka iing dorbar thaw ain, ban iatai iathir ban iasaid ha ki bynta bapher bapher ha kiba bun syrtap, na ka bynta ka jingmyntoi bad ka jingbha Jong ki paidbah, ha ki shnong ki thaw, ki dong ki thain, ki raid ki hima bad kumta ter ter.

Kumta haba jied nongmih khmat ngi dei ban pynshong Nongrim bad pynshong dor ialade, ban jied da ka jingkitkhlieh ym dakaba leh shongshit , ngim dei ban shah pynthame lyngba ka pisa , lyngba ki jingpyndih buaid bad ki wei ki wei ki rukom leh ki rukom pynthame ki bym shonghok bad ki bym don Nongrim ha ka por elekshon.