Shillong:Ka kmie bad ka longiing ka la sah ha ka jingdum bym lah shuh ban batai hapdeng ka jingjaw ummat, shaei u khun u don.
U samla Sanborlang Marwein 22 snem ka rta, ula jah mynta la ar bnai thok naduh ka 4 tarik Jymmang naduh ka por 8:30 am uba la phet bad jah rngai na iing.
Ka kmie u samla Sanborlang ka kong Brolina Marwein, kam ioh thiah ioh dem shuh ban iai ap ia la u khun khadduh ba un wan phai biang noh sha iing.
U Samla Sanborlang ula mih na phet na iing kaba don ha Mawtawar Laitlum, da kaba mareh sha khlaw haduh ba kiba haiing kiba leit bud ia u, kim lap dien shuh.
“U phet na iing ha ka por 8:30am mynstep sha khlaw thain Nongkohlew, Mawsiatkhnam, u shu leh lynga pisa beit shi taiew bad u sngew kumba thar, long kumba tan kumba khem ha ka met. U sngew jaituh ban trei eiei ruh. U ong ban shong ha iing ruh um sngew juh shuh, u mut leit sha shnong ngam shah. U leit sah kai ha iing hymmen ar miet bad ula wan biang bad u ong um juh shuh ban sah ha Mawtawar, u kit ia ka jain u phet sha Kyntonmawssar bad hadien ba la khroh ula wan phai biang. La ialam ban phah duwai sha u Pastor, uba la iathuh ba une u khynnah u shah tap ha ka jingdum. Hadien ba u la jah kumba shi taiew, la leit phah duwai bha ha Pastor bad ula iathuh ba une u khynnah ula phet jngai bha bad un sa wan phai”, la ong ka kmie u samla Sanborlang.
Halor kane, la ioh ban iakren bad ka kmie jong u samla Sanborlang, ka kong Brolina kaba la iathuh ba u khun jongka, u dei uba smat uba sting, uba ju sngew tynnad bha ban mareh step shaduh Upper Shillong, sha kylleng ki jaka ka sor bad wat kiwei ki jaka. U don ka jingthrang ban long pulit bad u smat u sting bha ban kilanmet bad ban iarap kam ha iing ha sem.
Hynrei kumba shi taiew eiei shwa ba un phet na iing, u la ud ba ka mynsiem jong u kam suk kam kmen, bad ka don ka jingsngew tieng sngew syier ha ka mynsiem jongu. Kane ka jinglong jongu, ka long kumba u don ka jingpang ka bym lah ban batai bad namar ba u dei u khynnah ba tip sngi, um ju pynsep ei ban pule ia ka baible man ka sngi bad miet.
Shi taiew shwa ba un jah, shu lyngnga pisa, u rah beit ia ka bible katba shaba leit bad u pyllong ia ka jingduwai ba u trai Jisu un pyllait ia u na ka jingshah teh shah khum bad u don hapdeng ka jingialeh ha ka mynsiem. Ka la iathuh ba la leit phah duwai ruh kylleng halor kane ka jingjah rngai u khun jongka.
Ka kong Brolina ka la iathuh ba mar ia jah u khun, kila pyllong ia ka jingwad kylleng ki khlaw ka thain Mawtawar, Nongkohlew, shariat NEIGRIHMS bad kiwei ki jaka hynrei khlem lap dien satia.
Ka la ong ba ka shnong Mawtawar ruh ka la pyllong ia ka jingwad shnong la bun sngi kynthih hynrei khlem lapdien satia.
Ka la iathuh ba haduh mynta ki pulit kim pat lap bad kim shym la pyntip ka la iaid kumno ka jingwad ia u bad ka mobile jong u ruh, ka dang don bad ki pulit.
Ka la iathuh ba ha ka por ba u phet na iing, u khlem rah satia ia ka mobile phone hynrei u rah tang kawei ka jain ha met. Kum ka kmie, ka la kyrmen ba u Blei un ri un sumar ia u bad ka la kyntu ia la u khun ba un wan phai noh sha la iing.
Phi don ban ong eiei?