Hadien 53 snem riew sairen, ban hikai iada lada hiar thma na suin

Shillong:Ha ka jingiaid ki 53 snem jong ka thma hapdeng ka India bad ka Pakistan kaba la jia ha 1971, mynhynnin ka sngi, ki briew kila sakhi biang ia ka jingpynlip ding ne blackout kaba 2 minit, kum shi bynta ban iada na ka jingshah hiar thma na suin.

Ka sorkar India ka la bthah ban pyllong ia ka mock drill ha ki 244 tylli ki district ha kylleng ka ri, shi bynta kumno ban hikai ia ki paidbah ban iada haba shah hiar thma na suin.
Shwa ban don ka jingpyllip ding, ka la don ka jingpynpah jingsawa ne siren bad sa bud sa ka jingpyllip ding kaba neh 2 minit.
Hadien kane, ka la don sa ka jingpynpah biang ia ka siren shi minit ban pynbna ba ka jinghiar thma ka la kut.
Shwa ia kane, ha ka por janmiet ka tnad Civil Defence ka jylla, ka la pyllong ia ka jingpyni nongmuna ne mock drill ha ki jaka ha sor kum ha St. Anthony’s School, Shillong, ban hikai ia ki paidbah ban iada ialade haba shah ther bom.

Ka jingpyni nongmuna ne mock drill ban iada haba shah hiar thma na suin, ka la long mynta ha por 4 pm ha St. Anthony School, Shillong bad ha kiwei ki jaka.
Kane ka mock drill ka long kumno ban iada ialade haba shah hiar thma da u bom ne namding na suin.
Ka tnad Civil Defence ka jylla ka la pyllong ia kane ka mock drill shi bynta hadien ba ka tnad kam pohiing ka ri, ka la bthah ia baroh ki jylla ha ki 244 tylli ki district, hadien ba ka jingiakynad hapdeng ka India bad ka ri Pakistan na ka jingsynreit kuli ki lehnoh ha Pahalgam ha kaba 26 ngut ki nongleitkai kila iap ha ka 22 tarik Iaiong.
Ka jingpyllip ia ka ding baroh kan long 2 minit ha ka por 6:30 pm.
Kane ka jingpyllong ia ka mock drill ka dei hadien ka thma ha u snem 1971 haba ka India ka ialeh thma pyrshah ia ka Pakistan.

Ha ka mock drill, la iashim bynta ki khynnah ka skul, ki doktor, ki briew ka Civil Defence bad kiwei.
Ka India ka la khyrwit hynne ka step da ka Operation Sindoor da u namding ha ki 9 tylli ki ktem lehnoh kiba pyllong jaka riehtngen ha Pakistan bad kumba 80 ngut kila kyllon iap. Ka jingiakynad hapdeng ka India bad ka Pakistan mynta ka la nang khluit shuh shuh.