Shillong: Ka Federation of Khasi Jaiñtia and Garo People (FKJGP) Central Body, hadien ba la ioh jingtip shaphang ka jingshah shoh pynmynsaw jong uwei paradoh para snam ha ki jaitbynriew Karbi kiba don kumba 50 ngut ei ei katba u dang wan shim dawai ñiangsohpet na ka shnong Lumlakhiat, ka la pynbitar lep ia ka seng hi baroh kawei namar kum kitei ki jingjia kila ju jia na ka por sha ka por kynthup ruh ia ka jing shah lum khajna be-aiñ ha kylleng ki jaka khappud bad ruh ka jingshah pynjulor ia ki jingthung-jingtep ha ki jaka rep. Ka jingioh lad ban shim kabu jong kitei ki jaitbynriew Karbi kadei na ka daw ba ki ioh ia ki jingiada ba pura na ki pulit Assam katba ki pulit jong ka jylla Meghalaya pat ki shu long tang kum ki nong peitkai.
Dang ha kine ki khyndiat taiew bala dep ki Karbi ki la sdang ban kurup wat ia ki jaka rep jong ki paid khasi pnar ha u Loom Pynthor kaba hap ha ka Shnong Lapangap, da kaba wan sher dara bad wanrah ia ki kor ki bor ban thang light ha kaba ki la thaw ruh iaki ing ki sem jong ki bad byrngem-byrsit ruh iaki Nongshnong Shnong Lapangap ba kim dei ban wan iuhkjat shuh ka katei ka jaka, ym tang katta katkum ki durkhih ba la ioh da ka seng kitei ki jaitbynriew Karbi ki la pyn donkam ruh da ki kyntien khlem akor bad kyntien kheiñpoh ia ki pulit jong ka jylla Meghalaya.
Ka FKJGP ka dap da ka jingsngewkhia ba ki bor sorkar jong ka jylla Meghalaya pat ki dang iohthiah lyngngai, wat haduh kane ka khyllipmat kaba mynta khlem da shim satia ia kino kini ki sienjam da kaba aidaw bad pyrshang ban thetkti ha ka kyrteng jong kata ka ‘Kam ia Pynbeit pud’ kaba dang iaid shakhmat. Kaba la pyndukha mynsiem shuh shuh ia ka seng ka long ba ka ka 27 tarik Jylliew katba ki nongialam jong ki kynhun Seng bhalang bapher bapher na Ri Lum Jaiñtia bad ki Nongialam jong ka Synjuk ki Waheh Chnong West Jaiñtia Hills ki dang pyrshang ban pynsngew ha u Symbud Myntri Rangbah jong ka Jylla ba ki donkam ia ki ophisar, la ka long ha ka District Administration ne ha ki bor Pulit kiba dei ki paradoh ki parasnam kiba sngewthuh ia ka ktien ka thylliej, kiba sngewthuh shisha ia ka khia ka shon jong ki paidbah, phewse u Symbud Myntri Rangbah uba khmih ruh ia ki kam Poh-ing jong ka sorkar Jylla um shym la ailad satia ban kren ia kata ka bynta da kaba u ong “Kane ka dei ka kamram jong ka Sorkar, phim lah satia ban iakren hangne”.
Ha kawei pat ka liang ka FKJGP ka pynrem jur ruh iaka jingkren jong u Myntri uba khmih ia ki kam jngohkai pyrthei uba la kynnoh ba ki Seng Bhalang kim dei ban pynlong jaka Kura (Punching Bag) ia ka sorkar halor ka jingjia ha ka shnong Lapangap bad ki kam iakajia Khappud. Ka jingkylli kaba mih mynta pat ka long ‘Hato ka jing shah thombor pat kiba ju jia na ka por sha ka por iaki paradoh ki para snam jong ngi ha ki jaitbynriew Karbi bad ki bor pulit jong ka Assam, ka dei ba ka sorkar Meghalaya ka pynlong jaka Kura (Punching Bag) ia ki paidbah ba lui lui tang na ka daw ba ka sorkar jylla ka dang iakren da ki phew tylli ki snem ia kata ka kam ia pynbeit pud bad ka jylla Assam?
Ka seng ka la dep shong iaka jingialang kaba kyrkieh ban ia thir sani bha halor katei ka bynta jong ki jinglong jingman ha ka shnong Lapangap bad ruh jong kiwei pat ki jaka khappud kiba don hapdeng ki jing iakajia, kumta ka seng ka bthah ia ki dkhot jong ka seng ba kin long kiba la khreh la ka long ha kano kano ka por ban mih madan, kampher long katba long jia katba jia “Lada kita ki bor jong ka Sorkar kim lah ban ai jingiada ia ki paradoh parasnam, ki Dkhot jong ka seng ki long kiba kloi ban shimti bad ha kata ka por ka sorkar kam dei satia ban kynnoh ba ki samla ki shim ia ka aiñ hala ka jong ka kti” pynkut ka kyrwoh.
Phi don ban ong eiei?