Shillong: U Director ka tnad ka koit ka khiah u Dr Aman War mynta ka sngi, haba jubab halor ka jingkynthoh jong u Director jong ka NEIGHRIHMS, ha kaba ia dei bad ka jingtest Antibody ha kaba sdang jong kane ka khlam COVID-19 ha ka jylla Meghalaya, u la ong ba u Director jong ka NEIGRIHMS, um don bor eiei ban kynthoh ia ka sorkar jylla.
Haba iakren bad ki lad pathai khubor u Dr War, u la ong ba ka sorkar lyngba ka tnad ka koit ka khiah na kaba sdang ki la pyndon kam ia ka Anti Body test, hynrei naduh ka 13 tarik u Nailur 2020 la pyndon kam ia ka Antigen Test bad ia ka RTPCR Test bad ban kynthoh ba ka tnad ka koit ka khiah ka dang pyndonkam ia ka Anti Body test ka long kaba bakla.
U Dr War u la ong ruh ba ka jingkren jong u Director jong ka NEIGHRIHMS, ka long ba u kwah ban pyni ba u tip, hynrei na ka jingkynthoh jong u ka paw shai ba ym don jingtip ei ei ruh em halor kane ka bynta.
U Dr Aman u la ong ba kane ka jingkynthoh jong u ha ka jaka ban pynshai bad ban pynsngewthuh ia ki paidbah, ka ialam bakla pynban ia ki paidbah. U la ong ruh ba ka sorkar jylla ka la don la ki jong ki kyndon bad ka sorkar jylla kan pyntrei kam ia kita ki kyndon kiba ka la buh.
U Dr Aman u la iathuh ba naduh ba sdang buh ia ki khyrdop ha ki jaka rung la test haduh 17000 ngut ki briew bad ki kyndon ki long kiba shai ba ki briew ba rung sha ka jylla ki hap ban leh ia ka test bad ki hap ban shong 10 sngi bad ia kiba long Positive ha ka Antigen la hap ban leh da ka RTPCR Test ban pynshisha.
U la iathuh ruh ba ha ki jaka rung jaka mih na ki 17000 ngut la test COVID-19 positive haduh 400 ngut bad na ki 68,000 ngut kiba la test naphang la lap 1500 ngut ki briew kiba long Positive.
Phi don ban ong eiei?