Nongpoh, 15 Iaiong: Hynnin ka miet, ki heh Pulit ha Ri Bhoi, kiba kynthup naduh ka kyrdan Senior Superintendent of Police, nangta ki ophisar Pulit ha ka kyrdan DSP lem bad kiwei ki kyrdan, ki la mih surok ban talasi naphang ia ki kali kiba iaid ha surokbah NH-6 ha Ri Bhoi.
Ia katei ka jingtalasi naphang ia ki kali, la pynlong ha mar pyrshah bad ka ophis u Deputy Commissioner ka Ri Bhoi, ha kaba lyngba katei ka jingtalasi, ki Pulit ki la ioh ruh ban dain kuna ia shibun ki nongniah kali bad kiba la pynkhein ia ki kyndon ain niah kali.
Haba kren sha ki lad pathaikhubor, u V.S Rathore, SSP ka Ri Bhoi, u la ong ba ha katei ka jingtalasi ki Pulit, ki la bat ia baroh kiba pynkhein ia ki kyndon ain niah kali, kata kaba kynthup naduh ia kito kiba niah kali ha ka por ba la buaid, ia kiba niah stei ia ki kali bad ruh ban lap ia kino kino ki kam runar kiba iaid lyngba ka surokbah NH-6 ha Ri Bhoi.
Shuh shuh, u V.S Rathore, u la ong ruh ba katei jingtalasi naphang ia ki kali, ka long ruh kum shibynta ban iada na ki jingjia ba sngewsih kiba la jia ha shilynter ha surokbah NH-6 ha Ri Bhoi bad kaba la wanrah ia ka jingduh ei ia kiba bun ki mynsiem briew.
U la ong ruh, ba tang ha une u bnai ba la dep, ki la don kumba 20 ngut ki briew kiba la duh ei iala ka jong ka jingim tang ha ki jingjia aksiden ha surokbah NH-6, ha kaba ynda ki Pulit ki la tohkit bha ia kiba kum kita ki, la lap ba ka daw hi ka dei, namar ka jingniah khlem akor bad ruh kaba niah kali ha ryngkat ka jingbuaid.
Katei ka jingtalasi kali ki Pulit, ka long ruh ban tehlakam naduh ia ki kam tuh kali, ki kam khaii Drok lem bad kiwei pat ki kam runar kiba jia ha surokbah NH-6 ha Ri Bhoi, la ong u V.S Rathore.
Nangne shakhmat, ngin sa nangpynjur ia ka kam ban talasi naphang ia ki kali kiba ïaid ha surokbah NH-6 bad lada ngi lap ia kiba pynkhein ain, kaba mut ba kin sa ngat ha ka jingshah dain kuna bad shah pynshitom katba ki kyndon Ain, u la bynrap.
Phi don ban ong eiei?