Jowai: Ki pulit ka West Jaintia Hills mynta ka step ki la ioh ban kem ia ki 6 ngut ki khar Muslim bad kurup ruh ia ki battery Mobile Tower ba shongdor ym duna ia ka 10 lakh tyngka.
Ka khubor na ki pulit, ka la iathuh ba hadien ka jingbuddien halor ka jingshah tuh ki Battery jong ki Mobile Company ha kylleng ka ri lum Jaintia hynne dang step ki la leit ban khynra ia kawei ka iing basah kitei ki khar Muslim kaba don ha Ladthadlaboh hajan Mooralong, ki la ioh kem 6 ngut katba ar ngut pat ki la ioh ban phet bad kurup haduh 148 tylli ki Battery kiba shongdor ym duna ia ka T. 6200 /- ne tam uwei uwei u Battery.
Ki pulit ki la ioh kurup ruh kawei ka Maruti Gypsy kaba don ia u No. ML04-3186 kaba la suba jur ba katei ka kali ruh kadei kaba don u No.plate ba shu pyndait thok da kitei ki nongtuh battery ba shyrkhei.
Na kitei ki 148 tylli ki battery, kitei ki nongtuh ki la dep pynpait haduh 107 tylli ban sei ia u Copper bad ia u Sisa (Lead) bad la thep ha ki byrni dewbilat ban kit leit die sha Kamrimganj lane sha Assam.
Kitei ki 6 ngut kiba la shah kem kidei kiba la tip kyrteng kum u Nujammil Ali (48) na Karimganj, Surujamal Ali (20) na Kamrup Asssam, Abduch Chalam na Krihamari, Barchuliya, Asssam, Fulchan Ali (30) na Karihamari, u Nur Hussain Ali na Kamrup bad u Raham Ali (63) na Nalbari, Assam.
Kine ki la tuh ia kitei ki battery na kylleng ki mobile Tower kiba don ha East bad West Jaintia Hills.
Ki pulit ki dang tohkit ia kitei baroh kiba la shah kem ban lap ia kiwei pat kiba donkti.
Phi don ban ong eiei?