Kong Linda Kongwang
KA BOR JABIENG: Ki jingmlien kiba lah ban pynsniew iaka jabieng. Ki sienjam kiba lah ban pynduna iaka jingkhuslai.
Ka jabieng ka dei ka dkhotmet kaba donkam tam jongu briew bad kano kano ka jingthut ne ka jingsniew haka jabieng, kalah ban ktatjur iaka bor pyrkhat, la jingkynmaw, ka jingsngew bad kiwei kiwei. Kaba sngewsih kalong ba bun nangi ngim da phikir shaphang kane, bad suki suki kine ki wallam ka jingkhuslai kaba lah ban ktah iaka jingim ba manla ka sngi jongphi. Haba don jingkhuslai, ka pynduhbor iaphi ban leh iakano kano ka kam bad kane ka ktah shibun iaka bor jabieng. Kidon katto katne ki jingmlien kiba sniew kiba ngi juleh kiba wallam ka jingthut haka jabieng hynrei ha shuwa ba kane kan jia, phi donkam ban shimkhia ban tehlakam iaka jingbanbor jongka jingmut jingpyrkhat ban lait naka jingshah ktah ka bor jabieng.
KATTO KATNE KI JINGMLIEN KIBA PYNSNIEW IAKA BOR JABIENG
- KA JINGDIH SIKRET NE DUMA:— Baroh ngi tip iakane ba ka jingdih sikret ne duma kadei kaba sniew naka bynta ka jingkoit jingkhiah jongka met bad khamtam ka wanrah ruh ka jingshahktah kaba jur haka jabieng. Ka jingdih sikret ka ktah iaka bor kynmaw bad kyntiew iaka jingma ban ngat halor kiba bun ki jingpang. Kane ka jingmlien suki suki ka pynrit bad tan iaka bor jabieng kaba ialam sha ka jingma ban shahktah haka jingim ba manla ka sngi.
- KA JINGLONG MARWEI:— Ka jingsngew long marwei kadei ka jait jingpang kaba ymdon dawai ban sumar hynrei kaba phi hap ban sumar hi dalade ialade. Ka jinglong marwei haka jingim ka ktah shibun iaka jingkoit jingkhiah jongka jabieng. Phi lah ban lap ba haba kiwei ki iakren ne iarkhie bad phi, ka wan ka jingsngewkmen haphi bad kane ka iarap ban pynkhih iaka jingmut jingpyrkhat jongphi. Ka jinglong marwei kalah ban pyndiaw bad pynkhuslai iaphi bad kane ka kyntiew iaka jingma halor ka jingtlot noh ka bor pyrkhat pyndain.
- KA JINGBYM IOHTHIAH BHA:— Na ka jingkyrni ban peitmiet, kiba bun ki ju leh klet hynrei kadei ka jingshisha ba ka jingbym iohthiah bha ka buh jingma ban ngat na shibun ki jingpang, hynrei ka jingduhthiah kadei ka jait jingpang kaba paw bha ha kaba iadei bad ka jingshahktah ka bor jabieng.
- KA JINGBYM KILAN MET THIKNA:— ka jing bym kilan met tista ka dei kaba ha khmat eh shadien ka jing ioh bunjait ki jingpang.Na ka daw ka jingbunkam kiba bun ki ju klet iakane bad ki duh ia shibun ki jingmyntoi naka jingkilan met.Ka jingbym pynkhih ia ka met baroh shirynieng ka kham ktahjur iaka bor jabieng kaba ialam shaka jingbym treikam bha ka bor kynmaw.
KATTO KATNE KI LYNTI KIBA LAH BAN SHIMKHIA BAN PYNDUNA IAKA JINGKHUSLAI BAD IARAP BAN TEHLAKAM IAKA JINGSHAH BANBOR KA JABIENG
- KA JINGSNGEWTHUH DALADE:— Kane kadei ka mat ba kongsan kabaphi donlan ban sngewthuh ia la kajong ka jinglong ba phi don bad kumno ban pdiang iaka jingsngewsih haka rukom kaba dei. Ka jingsngewthuh ialade kan iarap pyllait na shibun ki jingeh ba phi iakynduh bad kane kan kyntiew halor ka jingsngewsting ka jingmut jingpyrkhat.
- KA JINGBHA JINGLONG:— Ban don iaka jingmut jingpyrkhat ne ka jingthmu kaba bha bad ka jingbha jinglong, kan ai jinghun bad jingkmen iaphi bad kane ka iarap pyllait na shibun ki jingmut jingpyrkhat kiba pynsngewsih iaphi bad wallam ka jingkhuid jingmut bad pyllait naka jingkhuslai.
- KIAR NAKA JINGLONG MARWEI:— Kynmaw ym don balah ban neh sah junom. Kumta ka donkam ban don ka jingiajan bad la kijong kiba haiing hasem, ki paralok ne ki para marjan naka bynta ka jingmyntoi ka koit ka khiah ka bor jabieng. Ban lait naka jingsngew kaba banbor haphi, philah ruh ban buh jingthoh halor ka jingsngew kaba phi don.
- KA JINGIOHTHIAH BHA:— Ka jingiohthiah bha kadei kaba kongsan halor ka jingtreikam borbah haka liang ka jingkoit jingkhiah jongphi bad kumjuh ruh ha kiba bun ki rukom treikam hapoh ka met. Ka jingiohthiah bha haka por miet kadei kaba kyntiew halor ka jingtreikam bha ka bor jabieng bad ka bor kynmaw. Kadei kaba lah ban wallam ka jinglong aram haka jabieng bad iakhun pyrshah iaka jingkhuslai.
- BAM KI JINGBAM BA TEIMET:— Ka jingjied ban bam iaki jingbam ba tei kalong kaba donkam. Ban bam ki jingbam kiba tei kalah ban ai jingiada na kiba bunjait ki jingpang ba shyrkhei bad kyntiew ruh haka liang ka koit ka khiah ka bor jabieng.
- KA JINGJIED IAKA JINGKILAN MET KIBA DEI :— Ka jingjied iaka rukom kilan met ymtang ba ka ai jingmyntoi halor ka jingkoit jingkhiah ka bormet hynrei kadei ruh kaba ai jingmyntoi haka liang ka koit ka khiah ka bor jabieng.
Phi don ban ong eiei?