Ka jingdawa ka VPP ia ka artikel 371, kan pyniap ia ka jaitbynriew, ong u bah PN Syiem

Shillong:U bah Pynshngain N Syiem uba dei u MDC ka Congress ula pynshai halor ka jingiatreilang ka Congress hapoh ka jingialam ka NPP ha KHADC.

Haba kren mynhynnin ka sngi, u bah Pynshngain ula ong ba ka daw bah kaba la pyllong ia ka Congress ban iatreilang ha KHADC, ka dei namar ba ka Congress ka angnud ban noh synniang ia ka jaitbynriew bad ula ai nuksa kum ka jingpynkhreh ia ka jingpynkylla ia ka Sixth Schedule ka riti synshar ka ri.
Ula ong ba dei na ka jingioh ia ka Sixth Schedule ba ka Meghalaya ka la lait na ka Panchayati Raj ha ka ri bad dei na ka Matti ka Congress kaba la ieid bad sngewthuh ia ki riewlum.

Ula ong ba ka jingdawa ka VPP ia ka artikil 371 kan pyniap ia ka jaitbynriew namar ba ka Sixth Schedule ka iada ia ka jaitbynriew. Ula ong ba kiwei ki jaitbynriew kum ha Ladak bad Arunachal Pradesh ki dawa ban ioh ia ka Sixth Schedule, balei yn dawa ban pynduh pynban ha kane ka jylla.