Ka jingshisha shaphang ka jingbaptis

AIS Suja

Ka jingshisha shaphang ka jingbaptis. Ka ktien Baptis ka wan na ka ktien Greek “Baptizo” ka mut pynngam, (immerse) lane immersion, pynngam hapoh um. Te balei ba pynbaptis ne pynngam ia u briew ne uba ngeit hapoh um? Ka daw ka long ba uta uba la khot ialade ba u long u Khristan ne u nongbud jong u Jisu Khrist dei ban pynngam ia u hapoh um ne pynbaptis ia u, bad ia ka jingpynbaptis lah ban leh hadien ka jingkylla bamut. Ka jingkylla bamut kam da dei eh tang ban rung balang ne don ha kata ka Balang. Hynrei ka dei shwa ia u ban phla pop (Repent) la ka rit ne khraw, u dei ban pynkhuid shwa ia la ka dohnud da ka jingphla (repent) bad ka jingshah duwai ha ki briew jong u Blei. U briew um lah ban map pop hynrei tang u Blei marwei.

Ngi iohi katkum ka Bible – “La pynbaptis ia ki, da u, ha ka wah Jordan: KI DA IA PHLA NOH IA KI POP JONG KI” Mathaios 3:6. Ka jingphla ia ki pop ka dei ka jingkha arsien (born again) da u Mynsiem jong u Blei. U Jisu u ong ha u Nikodimus – “Shisha shisha Nga ong ha me (Nikodimus), lymda kha ia u briew na ka UM bad na u Mynsiem, um lah ban leit shapoh ka hima u Blei” Ioanis 3:5 “Ia kaba la kha na ka doh ka long doh: bad ia kaba la kha na ka jong u Mynsiem ka long mynsiem” Ioanis 3:6.

Te balei ba donkam ban pynbaptis haba la long Khristan? Ka daw ka long, ba hadien ba u briew u la dep ban phla pop bad pynkhuid ialade donkam ban pynngam ia u hapoh um ne pynbaptis ia u khnang ba un ioh bynta ha kata ka jingmihpat sha ka jingim bymjukut. Haba u briew u la ngam hapoh um bad mihpat napoh kata ka um u la long kata ka dak jong ka jingmihpat. Haba la btep lem bad u (bad u Khrist) ha kata ka jingbaptis, ha kaba la pynmih lem ia phi ruh bad u da ka jingngeit da ka jingtrei u Blei uba la pynmihpat ia u na kiba iap” Kolossai 2:12-15.“Phim ju tip? ba kat kiba na ngi ia kiba la ioh pynbaptis ia u Khrist Jisu; la pynbaptis ia ngi kein ia kata ka jingiap jong u? Namar kata kein la btep lem ia ngi bad u DA KA JINGBAPTIS ia kata ka jingiap jong u: ba kat kumba la pynmihpat ia u Khrist na kiba iap da ka burom jong u Kpa, kumta ba ngi ruh ngin ia iaid HA KA JINGTHYMMAI KA JINGIM” Rome 6:3-4 (Kane kein ka de kata ka jingpynbaptis).

U briew haba la pynkhuid ia u ia ki pop jong u, u ong – Ah kumno ngin leh? U Petros u ong ha ki “To phin kylla kaba mut bad un Pynbaptis ia phi uwei pa uwei (Repent bad be baptise) ha ka kyrteng u Jisu Khrist ia ka ban ioh map ki pop bad phin ioh diang ia ka jingai u Mynsiem (gift of Holy Spirit)” Ki kam ki Apostol 2:38.
Namar kata u briew u donkam ban pynim ialade na kane ka pateng bynriew kaba kynriang, da kaba phla ia ki jingpalat bad ioh map ia ki pop” Ki kam ki Apostol 3:38.

Namar kata, ka jingbaptis ka dei ka sakhi ba la btep lem ia ngi ia kata ka pop, bad mih nangta kum u briew uba thymmai (new creation) ban iaid ha kata ka jingpynthymmai ka jingim ba kynja mynsiem.
“To pynim ialade (ong u Petros) na kane ka pateng bynriew ba kynriang” ki kam ki Apostol 2:40.