S.K.N
“Ngam khuslai than ia ka bam ka dih, nga lah ban rep ban riang ryngkat bad u Kthaw bad ka Kyiaw kam pher” u hep u la kren marwei marwei.
Tad haduh ban da poi ha iing, ki jingmut jingpyrkhat jong u ka snoh bad leit beit tang sha ka Lydia. Kumjuh haba phai sha ka Lydia ha kata hi ka miet ka shim ia ka rai ban pdiang ia u Hep namar ka sngewthuh ba u dei u briew ba bha bad uba tip briew tip blei. Kumjuh ka iing ka sem ruh kaba donburom nalor ba u Kpa jong ka u la ai ksai lypa ba u kwah ba kan iapoi bad u Hep.
“Lashai lada u wan ngan shu test shuwa bad ngan sa pyni dak ba nga la pdiang lypa ia u” la pyrkhat lypa ka Lydia, hadien kata ka sa thiah suk jai.
Ha kata ka miet u Hep hapdeng ka jinglynga mynsiem shaphang la ka jingtyrwa, u la ioh thiah da ka jubor justi. Hapdeng ka jingkynoi ka miet u la phohsniew kumne
“Ka Lydia ka la wan iakynduh ia u bad ka ong ‘Hep nga ieid ia phi’. Hangta ka jingiakdup ieid bad ka jingiathain kti ka la jia bad baroh arngut ki la ia kren bad la ki Kmie ki Kpa. Baroh arliang iing ruh ki pynpaw ba ki suk ki hun beit ia kata ka jingiaieid ia thoin jong ki. Kumta ki la ia leit shangkai pyngngad harud kawei ka wah kaba itynnat bha bad katba ki dang ia shong hangta la wan kynsan u lapbah lapsan joit ki ieng naba shong ban mareh rieh slap; hynrei ha kata ka jingmareh ki la ia bakla lynti iwei ia iwei pat namar.”
Hangta ruh u Hep u kyndit noh na kaba iohthiah bad u la pyrkhat lyngngoh balei ka long kumta.
“Imat ym longkam namar la ju ong ba ka jingphohsniew ka ju long khong pong..” u la kren marwei
“Em ngan ym ngeit ngan leit iakynduh beit ia ka da ka jingkyrmen ba kum kata ka jingong kum kata ka jingngeit mynta kam dei shuh” la rai u Hep.
Marsien poi ha iing ka Lydia u Hep u la pyrta ia ka kyrteng jong ka. Kumta ka ruh wut wut wut ka la wan mih da lade.
“Ale hep ale ..” ka la ong
U Hep u la rung hapoh iing.
“Phi don bad no…?” la kylli u Hep
“Marwei i Mei i Pa ruh sha lum ki don ..” la jubab ka Lydia.
Haba tip ba ka don marwei u Hep u la sngew kmen bad u ngeit ba lehse kan pynpaw ei ei noh ia u. Ka Lydia ka la kylli shaphang ka sngi ba la dep namar ba ki ia wan miet.
“Kim ia ong ei ei Hep ba phi poi iing miet” la kylli ka Lydia
“Em, kin ong kumno ki la tip ba nga wan beit shane te..” la jubab u Hep
“O ka biang, ka mut ki la ia hun beit kein mo…?” la buh jingkylli biang ka Lydia
“Hooid” la jubab u Hep
Hadien katto katne ka jingiashong kai, ka Lydia ka leit shim ia u kitli bad shet sha. Kumta ki la ia dihsha lang tang arngut hi. U Hep hangta katba u dang peit shain sha ka dur khmat ka Lydia u la shlei miar da ka jingieid bym lah batai shuh. Kata ka la pynbor ia u ban biria pharshi noh watla um nud ban iakren shai.
“Ki shijur kiba ia dihsha lang katno kin kmen ka mynsiem kham palat ban ia kito kiba dang shu ia ithuh ithaw tharai mo.” La ong u Hep.
Ka Lydia ka la shu rkhie bad ong,
‘Ni ine i Hep lei te ba nang bha, jingstad pharshi te..” ka la rkhie artat.
U Hep ruh u la rkhie pashait bad ong,
“Em ngam kren pharshi hynrei nga shu mutdur”
“Kein noh kein noh phi ba nang bha” la ong sa ka Lydia.
U Hep u shu sngap noh. Kham hadien kata ka Lydia ka la sngewthuh ia ka jingsahnud jong u. Hapoh la ka mynsiem ka la lynga bad ksaid jubor kumno ban ai noh ka jubab. Haba ka peit ia u ka la sngewsynei palat bad ka la iohi ruh haduh katno ba u ieid shisha ia ka.
“Hep, nga sngewthuh ba phi ieid shisha ia nga, hynrei haba nga pyrkhat ia lade pat nga sngew synei ia phi namar ba ngam long kaba bit nam bad phi. Nga long kaba duna nadong shadong ngam tip balei phi pat phi mon ia nga..” la pynpaw ka Lydia
U Hep u la sngap shiphang bad u la ong,
“Baroh kaba phi ong ngam lah ban sngewthuh, hynrei ki dei tang ki daw kiba phim kwah ba ka jingieid jong nga kan ioh jaka ha phi kata ka shong eh ha phi..”
“Hep, phin lah hi ban pdiang ia nga ryngkat bad kita ki jingeh ki jingduna baroh?” la buh jingkylli biang ka Lydia. [yn dang bteng]
Phi don ban ong eiei?