Ki Bus Smit ki rim tang kikot hynrei ka kali ka thymmai, wat u Phareng ruh u la dep thied

Shillong 09 Jymmang: Hadien ba ka sorkar jylla, lyngba ka Cabinet meeting, ba ka la mynjur ia ka policy ba kan nym Shah shuh ia ki kali ki ba ladap 35 snem ka rta ban iaid ha surok namar ka ktah ia ka koit ka khiah lyngba ka jingmih ka tdem ba jaboh na kitei ki kali bad ruh ka jingdheng kali.

Ka jingthmu ka sorkar jylla ban nym Shah shuh ia ki kali ba ladap 35 snem rta shajrong kalong shibynta ban ioh ia ka lyer ka ba khuit.

Ha ka jingleit iakynduh u nongthoh khubor jong u Rupang mynta ka sngi Thohdieng, ka 09 Tarik Jymmang 2025, u la leit ban iakynduh kyrpang ia ki nongniah kali Bus smit, ki badei ki kali ki ba la rimbha ha Nongbah Shillong.

Ha ka jingiakren bad ki nongniah kali Bus smit ki la pynpaw ia ka jingsngew bynniaw halor kane ka jingpynmih hukum ka sorkar, namar la bun bun snem ki la imja lyngba da ka jingniah kali.

Ki Bus Smit kidei ki ba la don naduh jong u snem 1967 shajrong bad ka ba la iaid mynta la bun bun snem ka rta, ka ba la ai jingiarap ia ki paidbah nongleit nongwan khamtam eh ia ki nongrep, ki khynnah skul, namar ka bai kali ruh ka kham eit ka dor ban ia nujor bad kiwei ki kali, hynrei lada ka sorkar kam shah shuh ia kine ki kali ban iaid bad ban kamai kan sa ktah shibun ia ki paidbah bad ki nongrep bad ruh khamtam ia ki ba kamai bad imja da kaba niah kali,ki la ong.

Ki nongniah kali ki la iathuh ruh ba kine ki Bus smit ki la rim tang ki kot ki sla namar ka sorkar kam ai ia ki kot ki sla ba thymmai, katba ka kali pat kadei ka ba thymmai namar man kapor ki ju shna bad pynthymmai ia ki tiar ki tar.

“Ha ka jylla jong ngi ki Bus Smit ki long ki ba lapaw bha kylleng kylleng bad ymtang ha ka jylla hynrei wat ki briew ba nabar jylla bad nabar ri ruh ki wan ban shong bad iaroh ia ka jingitynnad ka kali namar la shna da ki dieng ki ba skhem bha”. Nalor kata ki la iathuh ba wat ki Phareng ruh ki la don ba thied ia ka Bus Smit mynshwa namar kalong ka ba itynnad palat.

Kumta ki nongniah kali Bus smit ki la kyrpat ia ka sorkar ba kadei ban pyrkhat bha namar lada wengnoh ia ki Bus Smit ban kamai ka ktah shibun ia ki paidbah bad ia ki nongrep.

Ki la iathuh ba lashai ka sngi ki nongniah kali Bus smit kin sa pynlong ia ka jingialang baheh bha ha stand Bus Smit ban iarai kaei ka ba kin shim bad kaei ka ba ki paidbah ki don ban ong halor kane ka mat.