Shillong:Mynhynnin ka sngi, ka Meghalaya High Court, ha ka jingpyniaid jong U bah W Diengdoh, kum u nongbishar bad U IP Mukerji, Chief Justice, ki la shim bishar, halor ka jingshem jingeh jong kiba don ha niam Khristan, na ka bynta ban ioh jaka tep, namar ba ia ka jaka tep jong kawei ka kynhun niam, ym shym la shah satia ban tep ia kiwei pat kiba dei na kawei ka kynhun niam bad kane ka la pynlong ba ka jingleit tep briew, ka long sha ki jaka kiba shajngai bha bad kumta ka kashari, ka ai jingmut ba dei ban ialam lang ia ki jaka tep briew bad ban ai jaka kiba dang thymmai, ban pynlong kum ki jaka tep bad ka kashari mynta ka sngi, ka la plie lad ban iakren halor katei ka jingeh, kaba ktah ia ki kristan ruh kumjuh bad la pynngat lang ia ki 3tylli ki District Council, ba kin don bynta halor kane ka jingiatai. Ha kajuh ka por, la bthah ia u amicus curiae, ba un iakren ia kane ka mat bad ki District Magistrate, na ka bynta ban wad lad ia ka jingeh jong ki riewngeit Khristan, ha kaba tep briew bad ba un phah ia ka kaiphod sha ka kashari bad ba un ai ia kaiphod, na ka bynta ban pyndonkam ia kiba la don ne ban nang pynheh shuh shuh ia ki jaka tep jong ki Khristan.
Kane ka mat, ka mih na ka jingiakren shaphang ka jaka thang briew, kaba dei ia kito kiba dei ki Khasi bad sa kiwei pat kiba dei ki hindu bad ka daw ka long ba ki duna bha, kine ki jaka thang briew bad ba kim kwah ban ia thang lang ha kajuh ka jaka.
Ha ka jingpynmih hukum, ha ka 8tarik Iaiong 2025, la iakren ba ka sorkar jylla, ka don jingthmu ban nang pynbun shuh shuh ia ki jaka thang briew bad ha katei ka por, la aiti ruh ha u amicus curiae, ba un iakren bad ki District Magistrate lem bad ki dkhot jong kitei ki kynhun, na ka bynta ba kin poi sha ka jing iabeit, ban pyndonkam lang ia ki jaka thang briew bad mynta ka sngi, na ka liang jong U bah N Syngkon, uba dei u amicus curiae, ula iathuh ba kitei ki ar kynhun, ki la ia mynjur ban pyndonkam lang ia kajuh ka jaka thang briew, tangba ka dei pat ban ia sam noh la ka jong ka jong ka jaka thang bad kumjuh ba kin pyndonkam la ka jong ka jong ka jinglehniam ia kiba iap.
Ka kashari, ka la buh por ban shong bishar biang ia katei ka kam, ha ka 12tarik Jylliew 2025.
Phi don ban ong eiei?