Ha U Editor,
Ko Nongsynshar ka Jaitbynriew Khasi phi phim long U Moses ne U Joshua. U dei U paidbah ba jied ia phi da ka rukom ka jingsynshar paidbah (Democracy).
Ka ktien kat kum Bible ka khang ba ngin kren thala lane ialeh pyrshah ia ki Nongialam bad ki Nongsynshar namar ba ki long kiba U Blei u la thung hooid ngi iohi ia ka Jingtrei bad ka Jingbishar ba hok ki ba U Moses, U Joshua bad kiwei kiwei ki lah leh kat kumba lah thoh ha ka kot bakhuid.
Ha ka jingshisha ban shu iai kynthoh pyrshah ia ki kam jong ka Sorkar lane ki Nongmihkhmat, ki paidbah hi kin ym da kwah than eh namar da ka jingngeit bad jingshaniah u paidbah u lah phah ia ki Nongmihkhmat ba kin shakri hok bad ban pyndep ia ki Jingkular kiba ki la khlei ha shuwa ban jied ia ki, bad haba U paidbah un iohi ia ka jingtreikam ba hok bad ba shai jong ki khlem pep U paidbah ruh un iaid lang bad trei ryngkat ryngkat khnang ba kan iaid beit iaid ryntih ka Synshar ka Khadar bad ban wanrah ia ka bha ka Miat jong ka Jylla hi baroh kawei.
Hynrei haba ki nongmihkhmat ki leh sting bad leh bym salia khamtam haba ka umsaw ka la jan poi haduh ka jingkhang bad ba ki Nongialam ki khlem pat pynkhreh kano kano ka jingiada u paidbah um banse ban takraiñ ia ki.
Ngi kyrpad ia ki Nongsynshar kiba don ka jingkitkhlieh ban sngewbha wanrah noh kloi ia ka Jingdawa jong U paidbah ia ka ILP khlem da pynslem shuh.
B. Nengnong