Shillong:U MLA ka Amlarem konstitwensi u bah Lahkmen Rymbui ula ong ba ki don kumba 40 km ki jaka markhap bad ka Bangladesh kiba hap ha Amlarem bad na kine, tang kumba 2 km ba la ker sainar shiah.
Haba kren mynta ka sngi, u bah Lahkmen ula ong ba kumba long mynta ka thaiñ khappud bad ka Bangladesh ka shngain namar ba ki shipai BSF ki pyrkhing bha ka jingpahara khamtam hadien ba la mih ka jingiakynad hapdeng ka India bad ka Pakistan.
“Ha ka konstitwensi jong nga, na ka 40 km, tang 2 km eiei la dep ker sainar shiah hynrei ki briew ki shngain namar ka jingpahara bha ki BSF bad ki pulit bad ka jinglong jingman ka jai jai”, la ong u bah Lahkmen.
Ha kajuh ka por, ula ong ba ka daw ba ki briew ki pyrshah ia ka jingker sainar shiah ka dei namar ba kin duh lut ia ki jaka ki puta bad wat ki jaka sah ne ki shnong kin hap shabar u sainar shiah lada ker 150 yard na u mawthum international boundary. Ula ong ba na ka bynta ka jingshngain ka ri, ka donkam ia ka bor sorkar ban pynsngewthuh bha ia ki paidbah ban iapynbeit ia kane ka kam.
“Ki paidbah ki sngew ba lada ker sainar 150 yard, ki don ki shnong kin don shabar u sainar shiah bad kumjuh ki jaka, bad kan dei ka jingduh ba khraw”, la ong u bah Lahkmen.
Ha kajuh ka por, u la ong ba ka jingker sainar ka long kaba donkam na ka bynta ka jingshngain ka ri hynrei ka sorkar ka dei ban thaw ia ki lad ki lynti kumno ban iapynbeit bad ki trai jaka, khnang ban lah ban ker sainar.
Phi don ban ong eiei?