Shillong: Ka seng NPP, mynta ka sngi, lyngba U Marcuise N Marak, MLA, uba dei ruh u nongkren jong katei ka seng, ka la kynnoh ba ki jingkynthoh jong ka seng Congress ki long ki bym shongnia bad kiba khlem nongrim bad ia kata, ula pynshisha, da kaba pyni ba ha ka Iing Dorbar Thawain kaba dang shu dep shen ha kaba ia baroh ki jingkylli ladep jubab bad pynshai kdar na ka liang ka Sorkar. Hangne ka paw shai ba dei ka jingshah rem halor ka jingiatai ‘No Confidence Motion’ ha ka Dorbar Synrai ba mynta u snem kaba la pynlong iaki ban pyrshang ialeh ban pynthohbria bad pynjah burom kat lah kat iai pyrshah ia ka Sorkar.
Haba ki sngewthuh bym lah kyrshan nia shuh ialade, ka Seng Congress ka la sdang wad daw bad pharep sa ia kiwei pat ki mat kiba iadei bad ka sain pyrthei khlem da pyrkhat shuh iaka bha ka miat u paidbah ka Jylla.
Tnat Bording
Ha ka jingiatai ha Iing Dorbar kaba iadei bad ka Tnat Bording Elektrik, U Bah George B. Lyngdoh u la wanrah ia ka mat shaphang ka jingbym treikam ki meter elektrik kat haduh ban shu phah siew antad iaka bai ding sha ki paidbah . U la bynrap ruh ba ki paidbah kim don jingtip ba ka jia kumta, te ka dei ka kamram jong ki nongtrei ka Tnat ban leit peit bad pyntikna lada don ki meter ki bym treikam khnang ban lait na ki jingleh thurmur ha ka rukom khein ia ka bai bording.
Halor katei ka phang u James Sangma, Myntri Sorkar kane ka Tnat, u la pynshai ba ia kum katei ka jingeh kaba la slem, ka Sorkar ka la pyrshang bad shimkhia da kaba wanrah da ki meter thymmai (smart meter) lyngba ka jingkyrshan bad bei tyngka na ka Asian Development Bank. Ka ADB ka lah bei tyngka na ka bynta kane ka projek ban sdang pyndonkam noh da ki smart meter khnang ban wanrah ia ka jingbit bad jingjanai ha ka rukom khein ia ka bai bording. U Myntri u lah bynrap shuh shuh ba ka Sorkar ka la map ia ka kuna halor ka jingslem ban siew iaka bai ding naka liang ki paidbah.
Kum ban shu pynshai, kane ka mat kam dei kaba dang shen hynrei la ju mad ia kum kane ka jingeh lah bun bun snem mynta. Ha ki por ba ka seng Congress ka don ha ka bor synshar, kam ju lah satia ban ai iaka jubab kaba shai bad ba pynhun halor kiba bun ki jingkylli. Kane ka pynpaw shai ia ka jinglong arsap arphong jong ka Congress kum ka seng sain pyrthei kaba la ju synshar la bun bun snem. Hynrei ka Sorkar MDA hapoh ka jingialam jong ka Seng NPP ka la shimkhia ban pynbeit ka kane ka jingeh ki paidbah wat ha i por ba khyndiat. Ym tang katta, hynrei ka Sorkar ba mynta ka da shimkhia haduh katta katta da kaba iatai bniah man ka por kumno ban wanrah iaka rukom sam bording bad ka rukom khein bording kaba janai bad ban ai jinghun bad jingmyntoi ia ki paidbah.
Watla hadien ba la ai ka jingpynshai ba bniah, u Zenith Sangma, Congress MLA, u iai wad daw wad dong ban wohnia, kaba pyni iaka jinglong khyllung khynnah jong u kum u nongmihkhmat paidbah. Ka jingkynnoh jong u ba ka Sorkar ka pynlait kuna (Delayed Payment Charges) bording tang na ka bynta ki karkhana treikam ka long ka bym don nongrim haei haei ruh.
U Myntri jong ka Tnat Bording u la pynshai shuh shuh ba ia katei ka kuna la map ym tang ia ki karkhana treikam hynrei ia ki paidbah ruh kumjuh bad kane kan long ka kabu tang shisien (One Time Settlement Scheme). Kane ka jingleh jong ka Sorkar ka long kaba suk ban sngewthuh da baroh ki paidbah kiba nang thoh nang pule ym kum u Zenith Sangma, u nongmihkhmat u ba im sngi tang ban pynsyrwa ia la ka por ban pynsngewthuh bakla ia ki paidbah lyngba ka Iing Dorbar ba don burom.
Ka Ganol Hydro Project ka dei ka projek jong ka Sorkar Congress ba ka la kular ban pynioh bording khlem jingthut sha ki paidbah, hynrei ka jingtrei ka bym iahap satia bad ki kular. Ka Congress ka la pynbna paidbah ba yn plie ia katei ka projek ha u Rymphang (February) 2018. Hynrei tad ynda ka Sorkar MDA ka la wan ha ka bor synshar, u Zenith Sangma u sdang kylli kylla pynban ia kane ka Sorkar.
Saubhagya Scheme
Wat la ka Sorkar ka la iai ialeh ban ai ki jingpynshai na ka por sha ka por, katba ka seng Congress pat ka la iai kynroi halor ki kam bamsap bamphong ki ba iadei bad ka Saubhagya Scheme. Ban iashai bad tip paidbah, ha ka por ba synshar ka Congress kam shym la leh eiei ban wanrah kum kine ki jait scheme kiba long ka jingmyntoi ia ki briew jong ka Jylla Meghalaya, watla ki tip eh ba kum kine ki jait scheme ki long ka jingmyntoi ia ki ba duk bad jynjar.
“La ju tip paidbah ba ka Congress ka dei ka seng kaba la ngam jyrsieh bha ha ki kam bamsap ba har rukom bad kaba iai bampong suki pa suki tad haduh ban da duhjait khlem iohi shuh bad kaba sahkut tang ki jingpynbang bad ki jingkular ia u paidbah. Kum kitei ki jait jingkdew kti ki long ki bym shongnia bad bym don nongrim haei haei ruh bad ka long kum ka jingkyrtoh kylla ialade. Ngi khmih lynti ba ka Congress ka dei ban trei shitom ban da wad ia ki jingshisha ban wanrah sha khmat naka bynta ka jingmyntoi u paidbah ym ban tap eit miaw ia la ki jong ki kam jaboh” ong shuh U Marak.
Phi don ban ong eiei?