[SKM]
[ba bteng] Namar ha ka jingshisha lei ngi la dei ban kren shuwa iaka Riia ka khun lajong tangba ngi sngew kmen ba i Bahnah i la wan bapli kumne bad ngi la ioh pynban ban iakren beit markhmat bad i ia kane kaba jia, namar ngim kwah ia ka jingsniew hynrei ia ka jingbha..” La pynpaw ka Kmie ka Riia
“Ka dei kata ruh Kmie…” La mynjur u Kpa.
“Te ngi la shai kumto, ngim don eiei pyrshah ia phi Bahnah hynrei tang kawei kaba ngi don ban kyrpad bad kata ka long ba phin long rangbah bad u Kpa ba lah ba iai mo…” La ban ktien biang u Kpa ka Riia
“To Mama..” La mynjur u Bahnah
“Te, kumno long ngin iakren noh mynta bad ka Riia ruh…” La buh jingkylli u Kpa ha ka Kmie
“Mynta mynta, te ap shuwa phi bapli ka dang pang ka khun sa peit noh lashai la shisngi ynda ka la kham jem..” La ai jingmut ka Kmie
“To ih ngin sa leh kumta .. tangba Bahnah phin hab ban wan lang mo khnang ba ngin iashai lang…” La phai ktien u Kpa
“To Mama…” La mynjur u Bahnah.
U Bahnah u la sngew lehrain shibun eh namar kaei kaba jia. U la pynrit ria ia lade bad um sngew neh shuh ban shongkai, kumba ju long mynshuwa namar u sngewthuh ba u la bakla jur. Kumta hi u la pyrkhat ban leit noh artat ba la kham miet. U la ong
“Mama, Mei, to nga la kham miet ngan leit noh mo.. Ngan shu leit kren ia i Riia mo..” La pan jingmut u Bahnah
“O hooid, to sa wan mo, wan peit ia i Riia…” La ong u Kpa
“To..” La ong u Bahnah
Joit u ieng bad leit rung sha kamra ka Riia. Katba u dang ieng hangta u jaw ki ummat bad u ong ia ka
“Riia, ngan leit noh shuwa..”
“Balei phi iam…?” La kylli ka Riia
“Em.. Ngan sa wan pat..” La shu ong u Bahnah u mih noh syndon.
Ka Riia ka la dum buit bad ka la mut ban bat ia u; hynrei u la da iaid kham jngai, ka shu ong noh sa da wan mo.. Hadien ba mih u Bahnah ka ruh ka iam.
Kumjuh ruh haba phai sha ka liang u Bahnah u long kumjuh namar ba la sngew diaw eh ia kaei kaba jia khlem pat pyrkhat um nang thiah nang dem shuh. Kine kiei kiei ki la phaloh ha ka jabieng jong u. Hynrei watla katta ruh u kut jingmut ban pdiang ia baroh kaba jia bad u rai ruh ban iathuh noh ha la ka hynmen. Kumta hi u sa ioh thiah jak.
Haba ka step ka la pei u Bahnah um lah khie thiah shuh haduh ba ka Deisy kan kyrsiew ia u ha ka por phra baje.
‘Bahnah phim leit trei…?” Ka la kylli ia u
“Ngan leit o lah sngi bha ne….” Ruma u Bahnah
“Lah da phra baje” iathuh ka Deisy
Kumta marsien ioh sngew ia ka baje u Bahnah u la khie joit na jingthiah. Bran u mareh ban leit bta khmat bta khmut u da ong de ha la ka hynmen ban iarap pynshet sha lem. Hadien ba la dep bta khmat u shim ban dih ia ka sha ba la pynkhreh ka Deisy bad u mih noh hi na iing namar ba la kham dier ka por.
Ynda la poi ha jaka trei ka mynsiem jong u kam suk kam kmen shuh namar u sngewthuh ba u la leh ka kam ba bakla pyrshah ia la ka baieid bad pyrshah ia la ka iing ka sem. U don hapdeng ka jingkhuslai mynsiem bajur. Hangta u la pyrkhat ba ynda poi ha iing u la dei ban iathuh noh ha la ka hynmen bad kumjuh ban leit iathuh sha la i Mei i Pa.
Namar ka jingsngew sih jur ha u kata ka sngi ka long ka ba slem palat.
Marsien poi ka saw baje u la lynga ka mynsiem ban leit noh. Kumta u la pyrkhat ban pan leit noh kham kloi na u trai dukan da kaba ai daw bym sngew khlain ka met. Ka jingpynbor ka bajur ka la pynlong ia u ban nud ban pynpaw ha la u trai.
“Mama, ngam da sngew khlain ka met…” U la leit iathuh ha u trai
“Sngew kumno Bahnah…” La kylli u trai
“Nga ktha palat ka khlieh..” La iathuh u Bahnah
“Te phin leit noh …” La ong u trai
“Lada ka long kumta hooid Mama…” La phai ktien u Bahnah
U trai dukan da ka mynsiem ba sngew synei u la phah sbun mynsiem ia u ban leit noh.
“Phi sngew long ban leit hi…” La kylli biang u trai dukan
“Hooid Mama nga biang hi nga shu leit shim taxi beit …” La ong u Bahnah
“To kata khie nang leit noh ma phi…” La ong u trai.
Ha kata ka por u trai dukan u la sei ruh shispah tyngka ban ai thied dawai ia u.
“Shim ine leit thied dawai noh ban jem noh mo… Sa sngap thuh ka met lada kham sngew shitom shong shuwa ha iing, tangba da pyntip mo…” La ong u trai dukan
“To Mama…” La kohnguh u Bahnah bad u mih syndon na dukan
Bran u pynbeit la ki kjat sha stand taxi bad u kiew taxi noh ban leit phai sha iing.
Marsien rung ha iing. Ka Deisy ka la lyngngoh bad kylli
“Bahnah Balei phi la da kloi wan…” Ka dang sngap kumno un iathuh. [yn dang bteng]
Phi don ban ong eiei?