S.K.N.
[ba bteng] “To ym lei lei tangba me dei ban tip la ka burom ka akor bad ki jingkitkhlieh kiba me la shimti naduh mynta.. Me tip ba kam dei kaba suk bad kaba sting ban kynjoh ia ka lyngkor long Kpa, khamtam me ba leit sha kawei pat ka jaka, ka iing ki ba don ba em bad nalor ka khun marwei, ka jingkit ka bakhia bha ha baroh ki liang. Ka suk ruh ka jong me, ka jynjar ruh ka jong me, ka duk ruh ka jong me, ka riewspah ruh ka jong me..” La sneng u Kpa.
“Hooid Pa…” La kohnguh u Bahnah.
Ka por ka la iaid haduh 10 baje mynmiet ka neh kata ka jingiakren kam jong ki bad u Bahnah. Khatduh u Kpa u la ong
“Nga te ngan leit thiah noh, nang ia shong phi,….”
Kumta hi u ieng bad u leit thiah noh sha la kamra thiah…
U Bahnah u la nang iashongkai bad la ka kmie. Ka kmie ka la sneng la kraw bha ia u bad shibun kiei kiei ki la iakren shaphang ka jingiadei iing dei sem bad ki nong sor. Ki la neh ban iakren kam haduh kynih syiar ki sa ia thiah noh
Ka Kmie ka la sneng la kraw la u khun bad pyni ha u shibun kiei kiei kiba u dei ban leh, ynda haba u la shimti ia ka Riia. U Bahnah ruh u la shu kohnguh ia kaei kaba ka Kmie ka kren. Hadien ba la biang kiei kiei baroh ar ngut ki ia leit thiah noh.
Ha ka step kaba bud hi u Bahnah u la dei ban leit phai noh sha Shillong. Kumta dang phyrngap u la khie naba thiah bad kumjuh ka Kmie jong u, ka la pyntiew sha tiew dud ia u.
Ynda u la poi ha Shillong ha iing sah wai ha Madanrting, u Bahnah u iathuh lut ia ki jingiakren baroh bad la ka Kmie u Kpa ha la ka hynmen ka Deisy. Haba la iohsngew ia kita baroh ka Deisy ruh ka pynbud ktien da kaba ia mynjur bad la ka Kmie.
“Bahnah phi dei ban kynmaw ia ki ktien i Mei i Pa baroh, ba kan long bha ia phi khamtam haba phi la jied ban rung kum ha iing ka Riia ka khun marwei. Lada phi leh bha phin suk hi, hynrei lada phi leh kai phin jot hi…” La bynrap ka Deisy “Hooid Dei…ngan hab leh kumta hi; hynrei te lah wai…” La mynjur u Bahnah. Hadien ba la wan na shnong u Bahnah u leit mih ha kata hi ka miet ha iing ka Riia. Marsien rung, ka Kmie ka Riia ka la kylli nyngkong,
“Kumno sha shnong ki ia long…?”
“Ki biang hi Mei…” La jubab u Bahnah
“Phi la dei ban khot Kyiaw ia nga mynta mo” la hikai ka Kmie ka Riia bad ka rkhie de
“”O hooid, shisha mo…” La phai ktien u Bahnah
Wan mih sa u Kpa ka Riia kumta hi u ruh u kylli. Hadien ba la shongkai shiphang ka Riia namar ka la kham khlain ka ieng bad leit buh sha hi ban ai ha u Bahnah. Katba dang dihsha u Kpa ka Riia u la kwah ban tip noh lano ban leit mih sha shnong sha iing, jong u Bahnah.
“Ki ia ong kumno Bahnah, ha iing…? Lano ngin ia leit noh sha shnong jong phi..?” U la twad jingmut.
“Katba kloi phi, sa iathuh ia nga ba ngan pyntip. Lah dei hi ban ia leit kham kloi mo…” La phai ktien u Bahnah
“O ka biang kein kumta mynba dang khlain ka Riia..” La bynrap ktien u Bahnah “Sa ia leit noh tang shu lah khlain ma nga…” Ong sa ka Riia
Hadien ba la dep dihsha ka Riia ka leit shong sha jingthiah bad ka wer artat ia u Bahnah. Kumta baroh arngut ki leit ban shongkai noh sha kamra thiah ka Riia. Katba dang shong hangta, ka Riia ka la sngew dung mynsiem bad ka la kwah eh ban panmap noh ha la u Kpa bad ka Kmie halor kaei kaba ka la leh pyrshah leh bakla. Kumta ka la pan jingmut na u baieid shaphang kata. U Bahnah ruh u la mynjur ba ka dei ban leh bad u ruh un sa don lang ban shim bynta namar ka donkam ban ioh ia ka longiing long sem ba suk ba kmen. U Bahnah u la ai jingmut ia ka ban leh ha kawei pat ka por.
“Riia nga te nga ong ia phi ban leh ha kawei pat ka por, ngan sa wan lang nga ruh, ngin ia pan map lang namar nga ruh nga la palat hi pyrshah ia ka iing jong phi. Bad kyrmen ba hadien kata ngin sa ioh ia ka longiing basuk bakmen..” La pynbud ktien u Bahnah
“Hooid to, ngin leh kumta mo, sa wan phi kein ba ngin leh kumta. Nga sngew pap shisha bapli i Mei i Pa ki la shu pdiang bad hun ia kaei kaba nga leh watla ki khlem tip tikna.. Nga ruh nga kyrmen ba phin iaineh bad ieid beit tang ia nga mo…” La phai ktien ka Riia
“Hehehe, sa shano pat, wat tang ia phi ruh ngam sngew lah pynhun namar nga long tang u khun baduk eh..” La kren biria u Bahnah
“Wat juh iathuh duk… Trei shitom minot ha ha kam kynshew phin sa riewspah kein…” Ong ka Riia.
Hadien katto katne por, u Bahnah ruh u mih noh namar ba la miet palat ban leit phai sha la iing.
“,thiahsuk Riia ngan leit noh…” La ong u Bahnah
“Ni lah sngew kwah ban ong sah noh Shane…” La pynpaw ka Riia
“Ap iaka por…” La ong u Bahnah
“To baieid, leit suk…” La pynkut ktien noh ka Riia
U Bahnah u mih noh nangta bad pynbeit la ki kjat bran sha la iing, namar ka por ruh ka la don shiphew baje.
Phi don ban ong eiei?