Shillong:U bah Alexander L Hek u la ong ba ka jingkynnoh halor jongno jongno ka don beit, hynrei kaba donkam ka long ban sei ia ki sabud sakhi ki ba biang halor ka jingkynnoh khnang ban lah ban leh eiei pyrshah ia kiba shah kynnoh, ia kane u la jubab halor ka jingdawa ka VPP bad Congress ban pynhiar shuki ia u bah Sniawbhalang Dhar halor ka jingkynnoh ka HNLC.
U bah Hek u la ong “Nga ruh nga dang pule tang ha ki kot khubor bad nga ruh nga don ha ka Congress, ha kato ka por hynrei baroh kine ki dei tang ki jingkynnoh, kiba dang donkam ban pynshisha ha ryngkat ki sabud sakhi, namar khlem ki sakhi bad thikna ym lah ban shu kynnoh kumto”.
“Nga sngew ba ngi donkam ban don da ka jingiakynduh lang ban iakren halor kane, ban sngewthuh halor ka jinglong jingman, hynrei kano kano ka jingkynnoh dei ban don da ki sabud ba biang bad nga sngew ba dei ban don ka jingiakren hapoh ka Sorkar MDA, hynrei tang lada don ki sabut babiang” u la bynrap.
U bah Hek u la ong ba ki jingkynnoh ki ju mih man ka por bad mynta ki kynnoh ia u bah Sniawbhalang Dhar, lashai ia uwei pat u myntri, hynrei kumno tangba don kata ka jingkynnoh yn pynlong ia kata ka jingialang donkam ban don da ki sabud ba biang halor kane ka jingkynnoh.
“Nga sngew ba ki dei ban pynshisha shwa ia ki jingkynnoh nangta ka sorkar MDA kan sa shim ia kano kano ka rai halor ka jinghiar shuki kumba la dawa da kiwei ki party”.
Halor ka jingbym treh ka Congress bad ka VPP ban shimbynta ha ka jingialang ban iakren halor ka railway project u bah Hek u la ong “Ka BJP ka dei ka party ka ba synrop hapoh ka MDA kumta kan iashim bynta ha kane ka jingialang ban long na ka bynta ka All Political Committee”.
U bah Hek u la ong ba kiwei ki bym dei ki ba iatreilang bad ka MDA kum ka VPP bad Congress ki lah ban kyntait ia ka jingshimbynta ha ka Committee.
“Ngam lah ban ong eiei halor ka rai ba ka Congress kam kwah ban don bynta ha ka jingialang jong ka All Political Committee, ka shong ha ki” u la bynrap.
Phi don ban ong eiei?