Shillong:Ki nongtrei jong ka GVK EMRI hapoh ka shatri jong ka Meghalaya EMRI Workers Union (MEM RIWU) myn hynnin ka sngi ki la shim ia ka rai ban pynsangeh noh ia ka jingsangeh treikam ka jong ki.
Kane ka la wan, hadien ba ka sorkar lyngba u myntri ka tnad ka koit ka khiah u James Sangma ula phah ka shithi sha ki hynnin ka jan miet ha ka por kumba 9.30 eiei.
“Ngi la peit bniah ia ka shithi bad ngi shem ka la biang wat la ym dei kaba la pynhun 100 persen ia ngi, ia kaba ngi shim tang 70 persen bad kaba sah ka long sa 30 persen,” ong u Publicity Secretary ka MEM RIWU u Bah Joseph Pyngrope haba ia kren bad ki lad pathai khubor.
U Bah Pyngrope u iathuh ruh ba la kyntiew ia ka tulop jong ki, hynrei kam kot kumba ki kwah ia kaba dang hap ban ia pynbeit shuh shuh, “Ka jingdawa jong ngi kam dei ban ioh ka tulop kaba malu mala hynrei kumba long mynta ngi dang ioh kaba dang duna.”
Ka shithi ka pynpaw ruh ba ka sorkar ka dang peit bad bishar bniah ia ki kam ha ka ban pyniaid ia ka jingtreikam ka 108 bad ka la kyrpad ba ka kam ka dei ban iaid shakhmat khamtam ha ka por jong kane ka khlam.
“Ngi ruh ngi sngewsynei ia ki paidbah kiba la shem jynjar da ka jingsangeh treikam jong ngi, kumta ngi la shem ia ka rai ban sangeh noh ia ka jingiakhih bad bteng ka jingshakri ia ki paidbah kiba donkam, ka jingsangeh iakhih jong ngi kam dei ba ngi la hun lut, hynrei ngi kloi ban iatreilang bad ka sorkar khnang ba ka kam kan iaid shaphrang,” bynrap u Bah Pyngrope.
Shuh shuh u iathuh ba ka jingtreikam biang jong ka 108 ka sdang ha ka por 7 baje janmiet myn hynnin ka miet, ha ka nongbah Shillong katba sha kiwei pat ki jaka ka jingtrei kan long ynda ki kali 108 ki la poi sha ki jaka treikam jong ki.
“Kumba ka long ka sorkar kam kwah ban don ki jingiakhih hynrei ka dei ban pynurlong ia ki jingdawa jong ngi, lada ym dei khala khala, hynrei ha ki por ban wan bad ka dei ban shim khia bha namar ka jingiateh soskular bad ka GVK kan kut noh ha ka 31 tarik u Lber, 2022,” ong u Bah Pyngrope.
U ong ruh ba ka sorkar kam dei shuh ban iateh soskular bad ki kompani kiba nabar namar ki kim sngewthuh ia ka rukom treikam bad ka jingeh ba ki paidbah ki mad dei tang ki trai shnong kiba sngewthuh bad tip kumno ban pynbit pynbiang ia ka jingdonkam jong ki.
Phi don ban ong eiei?