Shillong:U Vice President barim jong ka Bharatiya Janata Party (BJP) Meghalaya u Gagan Jain u la ong ba ka Party ka la buh thong kaba hakhmat eh ban pynkhlain biang ia ki nongtrei hapoh ki lai snem ban sa wan.Ia kane ka rai la shim kum shi bynta ban pynkhreh ilekshon MLA 2028 ha kaba ka Party ka buh thong ban jop bun tylli ki seats hapoh Meghalaya.
Hashuwa kane ka BJP ha ka 12 Tarik Iaiong kala plie paidbah ia ka State Level Exhibition kaba pyni paidbah ia ka jingiaid lynti jong ka BJP hapoh ka ri India kaba la long ha ka 12 tarik, Iaiong hapoh ka ophis treikam jong ka Party.
Haba kren sha ki lad pathai khubor u Gagan Jain u la ong ruh ba ka BJP ha Meghalaya ka la rai ban pynkhlain shuh shuh ia ka party da kaba pynshlur ia ki paidbah ba kin long ki pyniasoh kum ki riewdkhot bad ki nongtrei jong ka party.
“Kumta kata ka jingiaid ban pynkhlain iaka Party naduh ki shnong kala sdang bad haka jingialam jong u Rikman Momin ngin bteng ban pynkhlain ia ka BJP Meghalaya bad ngin pynshlur ia ki (Nongtrei) karyakata ba shisha ban mih shakhmat ha baroh ki mandal” la ong u Gagan. Ha kane kajuh ka sngi, ka BJP Meghalaya Pradesh ka la pynlong ruh ia ka jingialang kynmaw burom ia u Kpa jong ka Riti Synshar ka ri India u Bhimrao Ambedkar da kaba kynmaw tympang ia u synniang u bynhei ba u la noh sha u sup u thiar jong ka imlang ka sahlang hapdeng ki jaidbynriew nongshong shnong jong ka ri India.
Ka Party, ha kane ka sngi ka la pynlong ruh ia ka jingiathir iatai halor ka Waqf (Amendment) bill ban pynshai ia ki jingshah ialam jong ki paidbah halor ka jingpynlong ain da ka Sorkar NDA ba ialam da ka BJP ia kane ka ain rew ha Parliament.
Phi don ban ong eiei?