Nongpoh, 14 Iaiong: Ka jingangnud ki paidbah na ki Phra tylli ki shnong kiba don ha ka thaiñ Nongtraw, ban ïoh ia ka jaka sumar kaba biang na bynta paidbah, ka la wan ban urlong bad kata ka dei ba mynta ka sngi, u Damanbait Lamare, MLA Umroi, u la leit ban plie paidbah ia ka Sub Centre, kaba la tei hapoh ka shnong Nongtraw, Ri Bhoi.
Haba plie ia katei ka Sub Centre, nalor ka jingdon u MLA, la sakhi ruh da ka jingdon ka Dr. A Kharduid, DMHO Ri Bhoi, u Bah Robert Dympep, Rangbah Shnong Nongtraw, kiwei ki nongtrei ka koit ka khiah bad ki riew Rangbah jong katei ka thain.
Ki shnong kiba don ha ka thaiñ Nongtraw bad ki ban sa ioh jingmyntoi na katei ka jaka sumar, ki kynthup ia ka shnong Umsarang, Nongtraw Bangla, Lumdiengngan, Lumrit, Kyrteng, Wah Mentait, Mawkduk, ha kaba lyngba katei ka Sub Centre, ki paidbah kin sa ïoh ia ka jingshah sumar bad khamtam eh na bynta ki longkmie bad ki khyllung rit.
Ia katei ka Sub Centre, la tei ha ka jinglut kaba la kot sha ka T. 55 lak, ha kaba la shna bad pynwandur bha da ka Nongtraw VHC.
Haba ai jingkren ha katei ka sngi, u la kyrpad ia ki nongtrei, ki ban sa trei hapoh katei ka Sub Centre, ba ki dei trei bha bad ym dei ban mih kano kano ka jingshah kynthoh halor ka jingtorti ka rukom treikam ha Nongtraw Sub Centre, khnang ba katei ka Sub Centre, kan da long shisha ka ban ai jingmyntoi ia ki paidbah jong katei ka thain.
Nalorkata, u la kyntu ruh ia ki paidbah kiba leit ban shah sumar hapoh katei ka Sub Centre, ba ki dei ban sumar bad lehkhuid bha, khnang ba katei ka jaka ai jingsumar, kan long kaba neh slem bad ba kan ïoh ruh ia kata ka nam ka burom, ba kan long kum kawei na ki Sub Centre, kaba biang tam, la ka long na Umroi Constituency, hapoh ka District bad ha ka jylla hi baroh kawei.
Phi don ban ong eiei?