Mairang: U Sub-Divisional Magistrate ka Mairang Civil Sub-Division, Mairang ha ka hukum ba la pynmih mynta ka sngi u la pyntip ba na ka daw jong ka jingiaikiew stet jong ka jingdon ki nongpang COVID-19 bad ki High Risk Contact ha ka Shnong Pyndengumiong, Mairang Civil Sub-Division, la pynbna ia ka Shnong Pyndengumiong kaba kynthup ia ka Dong Lumiew, Dongbir, Dong gate, Lummaralong, Langstiehrim bad Umwiehsup kum ka Containment Zone kum shibynta ban tehlakam ia ka jingsaphriang jong u khniang jingpang COVID-19.
Katkum kane ka hukum, yn ym shah iano iano ruh ban rung ha katei ka Containment Zone lait noh ki nongtrei jong ka tnat ka koit ka khiah bad kito kiba la ioh jingbit na u Incident Commander ba dei peit ia kane ka shnong bad baroh ki nongshongshnong ki dei ban shong khop ha la iing, ki dei ruh ban deng mask tikna, kim dei ban iakhleh bad kiwei pat bad ki dei ban sngapthuh bha lada ki don kano kano ka jingsngewshitmet ne jyrhoh ne dap shadem bad jynjar ban ring ne pynhiar mynsiem. La kyntu ruh iaki ban iashimbynta ryntih ha ka jingtes ia ka jingpang COVID-19 ha ki dong ki jongki da ki nongtrei jong ka tnat ka koit ka khiah ka sorkar jylla.
Shuhshuh, baroh ki dukan kiba don ha ka Shnong Pyndengumiong kin khang lut bad kino kino ki kam shna iing ne shna surok ki dei ban sangeh noh mardor. Ki ophis bad ki bank kiba don hapoh u pud u sam ka shnong Pyndengumiong ki lah ban plie tat ynda ki la ioh jingbit na u U Sub-Divisional Magistrate ka Mairang Civil Sub-Division, Mairang.
Kino kino kiba pynkhein ia katei ka hukum kin shah pynshitom katkum ki kyndon ain jong ka Disaster Management Act, 2005 bad ka IPC.
Lah ban kdew hangne ba naduh ba sdang jong ka ka khlam COVID-19 bad haduh mynta, ha ka shnong Pyndengumiong lah don kumba 113 ngut ki nongshongshnong kiba la shahktah ha kane ka khlam bad 7 ngut ki mynsiem ba kordor ki la khlad noh na ka daw jong ka . Haduh mynta ka sngi dang don kumba 18 ngut kiba dang don ia une u khniang jingpang ha ka Shnong Pyndengumiong.
Phi don ban ong eiei?